Donald Trump (Umurepubulikani) w’imyaka 78 y’amavuko yamaze kubona amajwi arenga ayo yari akeneye (277) kugira ngo yegukane intsinzi mu matora ya Perezida wa Leta Zunze Ubumwe za Amerika. Muri aya matora yari ahanganye n’umukandida w’Abademokarate, Kamala Harris w’imyaka 60 wagize amajwi (224).
Perezida Donald Trump yahise atangaza ijambo ryo kwishimira intsinzi, ashimira Amerika yamwizeye ikamuha inshingano zo kongera kuyiyobora. Yijeje Abanyamerika ko atazabahemukira.
Amatora ya Perezida wa Leta Zunze Ubumwe za Amerika yabaye tariki 05 Ugushyingo 2024, yitabirwa n’Abanyamerika barenga miliyoni 82.
Perezida Donald Trump asubiye mu Biro by’Umukuru w’igihugu (White House) nyuma y’uko yari yiyamamarije manda ya kabiri mu mwaka wa 2020, ariko agatsindwa na Perezida Joe Biden.
Kamala Harris iyo aramuka atowe, yari kuba ari we mugore wa mbere utorewe kuyobora igihugu kuva cyakwigobotora ubukoloni kikitwa Leta Zunze Ubumwe za Amerika mu 1789, umwaka bemeje Itegeko Nshinga bakanatora Perezida wa mbere (George Washington) ku itariki 07 Mutarama.
Si Umukur w’igihugu watowe gusa kuko Ishyaka ry’Abarepubulikani ryegukanye intsinzi no mu zindi nzego. Muri Sena Abarepubulikani begukanye intebe 52 kuri 42 z’Abademokarate. Mu Nteko Ishinga Amategeko (House), Abarepubulikani babonye intebe 198 ku 180n z’Abademokarate; na ho mu baguverineri Abarepubulikani babona 27 kuri 23 b’abademokarate, nk’uko byatangajwe n’ibiro ntaramakuru Associated Press.
Panorama
