Abantu umunani nibo baguye mu mirwano yabaye ku Cyumweru tariki ya 11 Mutarama, 2026 hagati y’inyeshyamba za Bakata Katanga n’ingabo za Repubulika Iharanira Demukarasi ya Kongo (FARDC) mu mujyi wa Bukama, mu Ntara ya Haut-Lomami.
Nk’uko byatangajwe n’umuyobozi w’agateganyo w’iyo teritwari, abakomeretse barashwe, bajyanywe mu bigo nderabuzima ngo bapfukwe cyangwa bavurwe mu bundi buryo.
Madou Kalenga yavuze ko bakiriye abasirikare ba FARDC bapfiriye muri iyo mirwano bakaba bari baje gutera ingabo mu bitugu bagenzi babo bahasanzwe.
Yagize ati:“Twari tubitezeho kuza gusuhuza no kwiyereka ubuyobozi, ariko bitunguranye twumvise amasasu. Ndetse natwe abayobozi ntitwari tuzi ibirimo kuba. Twahise tuvugana n’ababayobora, batubwira ko batewe n’abantu biyitaga Bakata Katanga. Habayeho imirwano yatumye inyeshyamba esheshatu za Bakata Katanga zipfa, ndetse n’abasivili babiri bagwa mu masasu atari abagambiriye.”
Ubuyobozi bw’aho bwongeye gutangaza ko abandi bantu umunani bakomeretse bamaze kwakirwa mu bitaro.
Madou Kalenga kandi yasabye Leta gutabara abakomeretse.
Ati: “Muri bo harimo abakeneye kubagwa, ariko kubera ko tudafite ibikorwaremezo bihagije byo kubikorera hano, turasaba Leta kudutabara ikadufasha kugira ngo abo bakomeretse bahabwe ubuvuzi bukwiye.”
Radio Okapi itangaza ko muri DRC hari imitwe myinshi y’inyeshyamba zivuga ko ziharanira uburenganzira bwazo, imwe igahitamo guhohotera abandi mu buryo runaka.
