Mu gitondo cyo ku wa 4 Werurwe 2021, imodoka z’ibitaro by’uturere hirya no hino mu gihugu, zatangiye gutwara inkingo za #COVID-19 kugira ngo zigezwe ku bigo nderabuzima. Izi nkingo ziratangira gutangwa mu gihugu hose ku wa Gatanu tariki ya 5 Werurwe 2021.
Inkingo zisaga 342,000 zaraye zigeze mu Rwanda. Hakiriwe inkingo 240.000 za AstraZeneca/Oxford SII n’izindi zisaga 102.000 za Pfizer-BioNTech mRNA zabonetse ku bufatanye na COVAX.
Minisitiri w’Ubuzima Dr. Ngamije Daniel, mu kiganiro yaraye agiranye na RBA yavuze ko Abanyarwanda batagomba kwirara ngo bateshuke ku ngamba zo kwirinda COVID-19 kuko igihari.
Yavuze ko izindi ngamba zihariye zo kwirinda iki cyorezo zizaganirwaho nyuma y’uko Abanyarwanda bangana na 60% bakingiwe.
Agira ati: “Tutaragera kuri uwo mubare, amabwiriza yo kwirinda ni ya yandi. Ni ugukomeza kwambara agapfukamunwa, gukaraba intoki, guhana intera, kwirinda icyatuma uhura n’abandi mu gihe utazi uko uhagaze utazi na bo uko bahagaze. Ndavuga mu buryo bwegeranye cyane utanambaye agapfukamunwa, ayo yaba ari amakosa akomeye, waba uri kwishora ku ndwara kandi tumaze kubona ko hari abantu benshi yahitanye.”
Kugeza ku wa 03 Werurwe 2012 mu Rwanda abamaze guhitanwa n’icyorezo cya COVID-19 ni 265, bari mu byiciro bitandukanye birimo abakuru n’abato. Abamaze kwandura ni 19,198 na ho abakize ni 17,569. Muri rusange hamaze gufatwa ibipimo 1,020,989.
Ku ikubitiro, izi nkingo zirahabwa abantu 171,480 barimo abakozi bo nzego z’ubuzima uhereye ku bajyana b’ubuzima kugeza ku bakora kwa muganga, abarengeje imyaka 65 y’amavuko, abasanganywe izindi ndwara n’abandi bari ku isonga mu rugamba rwo guhangana na COVID-19. Abari munsi y’imyaka 18 ntibazakingirwa.
U Rwanda rufite gahunda yagutse yo gukingira abantu bagera kuri 30 ku ijana mu mpera za 2021, bakagera kuri 60 ku ijana by’abaturage bose mu mpera za 2022.
U Rwanda rubaye igihugu cya kane muri Afurika gihawe inkingo za COVID-19 muri gahunda ya COVAX, nyuma ya Ghana, Nigeria na Côte d’Ivoire.
Rwanyange Rene Anthere
