Abanyarwanda batuye mu Butaliyani bafatanyije n’inshuti zabo ndetse n’abahagarariye inzego zitandukanye, bateraniye mu murwa mukuru Rome ku wa 7 Mata 2026 mu gikorwa cyo kwibuka ku nshuro ya 32 Jenoside yakorewe Abatutsi mu 1994. Iki gikorwa cyateguwe n’umuryango Ibuka Italy.
Ibirori byabereye muri Bazilika ya Saint Bartholomew, ahantu hafite amateka akomeye ku rwego rwo kwibuka abishwe bazira ukwemera kwabo, hakaba harahiswemo nk’ahantu hakwiriye kwibukirwa Jenoside yakorewe Abatutsi.
N’igikorwa cyatangiye n’isengesho rusange ryahuje abitabiriye mu mwanya wo gutekereza no kuzirikana, ababo, hakurikiyeho umuhango nyir’izina wo Kwibuka ku nshuro ya 32, waranzwe no gucana buje no gufata umunota wo kwibuka inzirakarengane zirenga miliyoni imwe zazize Jenoside yakorewe Abatutsi.
Muri uyu muhango, hatanzwe ubutumwa n’abayobozi batandukanye bo mu nzego za dipolomasi n’imiryango itari iya Leta. Abagize umuryango wa Sant’Egidio, barimo Prof. Paolo Boruso, bagaragaje ko hakenewe gukomeza gushyigikira ibikorwa by’amahoro no kwibuka.
Abahagarariye u Rwanda mu Butaliyani, barimo Konsule Enrico Lalia Morra na Ofer Arbib, bongeye gushimangira ko bazakomeza gushyigikira ukuri kw’amateka no gufasha ibikorwa byo kwibuka.
Mu butumwa bwe, Pacifique Ndayishimiye umuyobozi w’abanyarwanda mu Butaliyani, yagaragaje uruhare rukomeye rw’Abanyarwanda baba hanze mu kubaka igihugu no gushimangira ubumwe bw’Abanyarwanda.
Umwanya wihariye wahariwe urubyiruko rw’Abanyarwanda ruba mu Butaliyani, rwatangaje amateka ya Jenoside yakorewe Abatutsi, ibyakoze ku mitima y’abari bitabiriye uyu muhango.
Uru rubyiruko kandi rwerekanye ko rufite ubushake bwo gukomeza gusigasira amateka no kurwanya ingengabitekerezo ya Jenoside, rugamije gutuma ihame rya “Never again” rikomeza gusigasirwa.
I Roma mu Butaliyani bibutse ku nshuro ya 32
