Ikipe ya Rayon Sports WFC yongeye kugaragaza ubukaka mu mupira w’amaguru w’abagore, yegukana igikombe cya Rwanda Women’s Super League cya 2025/2026 ku nshuro ya gatatu yikurikiranya.
Ibi yabigezeho nyuma yo gutsinda Muhazi United WFC igitego 1-0 mu mukino w’umunsi wa nyuma wa shampiyona wabaye ku wa 5 Mata 2026, wabereye ku kibuga cya Nzove.
Muri uwo mukino, igice cya mbere cyarangiye amakipe yombi anganya ubusa ku busa, ariko mu gice cya kabiri, umukinnyi Gikundiro Scholastique atsinda igitego kimwe rukumbi cyatumye ikipe ye itwara intsinzi, bituma ihita yegukana igikombe.
Rayon Sports WFC yarangije shampiyona ifite amanota 57, inafite ibitego 62 izigamye, ibintu byayihesheje gutwara iki gikombe cya shampiyona ku nshuro ya gatatu yikurikiranya.
Iyi kipe yabaye iya kabiri mu mateka y’umupira w’amaguru w’abagore mu Rwanda ibashije gutwara ibikombe bitatu bya shampiyona bikurikirana, nyuma ya AS Kigali WFC yigeze kubitwara inshuro 10 zikurikiranya hagati ya 2008/2009 na 2017/2018.
Nyuma yo kwegukana iki gikombe, Rayon Sports WFC yashyikirijwe imidari ya zahabu, igikombe ndetse n’igihembo cy’amafaranga angana na miliyoni 20 z’amafaranga y’u Rwanda, kikaba ari cyo gihembo kinini kurusha ibindi byatanzwe mbere.
Iyi kipe kandi izahagararira u Rwanda mu mikino ya CECAFA Women’s Club Championship, aho izaharanira itike yo gukina ku rwego rwa Afurika.
Ibihembo by’uyu mwaka byiyongereye ugereranyije n’ibyari bisanzwe, bikaba biri mu murongo mushya w’iterambere ry’umupira w’amaguru mu Rwanda uyobowe na Perezida wa FERWAFA, Shema Ngonga Fabrice.
Muri uyu mwaka w’imikino, Rayon Sports WFC yasoje ifite ibikombe bitatu, nyuma yo kwegukana kandi Rwanda Women Super Cup itsinze Indahangarwa WFC ibitego 4-0, ndetse n’Igikombe cy’Intwari yegukanye itsinze iyo kipe ibitego 2-0.
Rayon Sports WFC yongeye kwandika amateka
