Mu mwaka wa 2025, ubukorikori bwinjirije impunzi zicumbikiwe mu Rwanda amafaranga y’u Rwanda agera hafi kuri Miliyoni Frw 50.
Yabonetse binyuze mu kuboha imitako irimo uduseke n’udukapu bigashakirwa isoko mu bihugu by’amahanga birimo na Amerika.
Binyuze muri gahunda y’Igihugu n’abafatanyabikorwa bayo, yo kwinjiza impunzi mu buzima bw’Igihugu no kuzifasha kwigira (Economic Inclusion Program for Refugees), impunzi ziba mu Rwanda zifashwa mu mishinga hagamijwe ko zishakemo ibisubizo, ubuzima bwazo bukaba bwiza kurushaho.
Bamwe bibumbiye muri Koperative bise Igisubizo ibona imitako, igizwe n’abanyamuryango 62, ihuriwemo n’impunzi zo mu nkambi ya Kigeme n’Abanyarwanda bayituriye.
Mu mwaka wa 2025, abayigize ibinjije Miliyoni Frw 4 mu mwaka ushize, bayakesha gucuruza imitako bohereza mu mahanga.
Abanyamuryango bayo bavuga ko uretse kubahuzan’Abanyarwanda baturiye inkambi, ku rundi ruhande byanatumye bava mu bwigunge.
Byanabafashije kubona amafaranga abafasha mu bikorwa by’iterambere, kuko mu mitako baboha harimo iyo bagurisha hagati ya Frw 3,000, Frw 7,000 ndetse na Frw 20,000, bagakuramo umusanzu wo Koperative ungana na1/10 cy’amafaranga binjiye yose hamwe.
Umwe muri izo mpunzi witwa Jacqueline Kazugu yabwiye Kigali Today ko ubumuga afite byatumaga yigunga, akumva ntacyo amaze.
Uko iminsi yicumaga, akegerana n’abandi baba muri iyi nkambi bihuriza muri Koperative.
Ati: “Ariko ubu ngubu mfatanya n’abandi badafite ubumuga, icyo bakora nanjye ni cyo nkora. Iyo naboshye mbona uko ngura amavuta y’abana, twaba twabonye isoko nkabagurira inkweto, mu gihe ntari nshoboye no gukorera igiceri cy’icumi, ariko iby’ingenzi ni uko nsigaye nibona muri bagenzi banjye kuko turabana bikampesha agaciro.”
Charlotte Mukantabana wo mu Kagari ka Kigeme avuga ko kwibumbira hamwe byamufashije kumenya uko abandi bimufasha kwiteza imbere.
Ati: “Nabashije kugura amatungo mato ndorora, nubwo mu rugo nari nsanzwe norora, ariko nashoboye kugura ingurube ebyiri, ngira n’inkoko. Uyu munsi ntabwo nakenera guha umwana igi ngo ndibure. Iryo n’iterambere nabashije kugeraho mfatanyije na benedata bo mu nkambi tubana.”
Umuyobozi wa Koperative Igisubizo, Peninnah Nyirankuri afite abana umunani, akaba ari impunzi imaze imyaka irenga 10 mu nkambi ya Kigeme.
Avuga ko amafaranga bacuruje bayatahana bakagabana, bagasigamo umusanzu wa Frw 500 kuri buri muntu hamwe na 1/10 ajya muri Koperative akabafasha kugura ibikoresho.
Yves Nshimiyimana ni umukozi ushinzwe amahugurwa mu muryango Indego Africa, ari na bo bahugura impunzi bakanazifasha gushakira imitako yazo isoko hanze y’Igihugu. Avuga ko 99% by’imitako impunzi zikora yoherezwa muri Amerika.
Ati “Tujyanisha ubumenyi bwo kuboha no kubaha andi mahugurwa y’ibanze yo kumenya gukora no kwihangira imirimo cyane cyane imicungire ya Koperative, kubera ko bigaraga ko iyo ifashijwe mu bumenyi no mu buryo bw’amafaranga, rwaba urwego rwafasha umwari n’umutegarugori kwiteza imbere.”
Muri rusange Koperative zikora ibikorwa by’ubukorikori mu nkambi ni eshanu, zirimo ebyiri zo mu nkambi ya Kigeme, hamwe n’izindi zo mu ya Mahama, umwaka ushize (2025), zose hamwe zikaba zarinjije amafaranga y’u Rwanda agera hafi kuri Miliyoni Frw 50.
Hari kandi Miliyoni Frw 6 zinjijwe n’izo mu nkambi ya Kigeme hamwe n’andi arenga Miliyoni Frw 42. yinjijwe n’izikorera i Mahama.
Biteganyijwe ko muri uyu mwaka wa 2026, zose hamwe zizinjiza arenga miliyoni Frw 100 arimo Miliyoni Frw 20.5 azinjizwa na Koperative ebyiri zo mu nkambi ya Kigeme hamwe na Miliyoni Frw 88.5 azinjizwa n’izikorera mu nkambi ya Mahama.
