Umukino wa nyuma w’irushanwa rya Campeonato Mineiro wabereye muri Brésil wahuje amakipe ya Cruzeiro Esporte Clube na Atlético Mineiro, wavugishije benshi inyuma y’imirwano ikomeye yatumye hatangwa amakarita atukura menshi cyane.
Uyu mukino wabaye mu rukerera rwo ku wa Mbere tariki ya 9 Werurwe 2026. Mu minota ya mbere amakipe yombi yakinnye asatirana, ariko ku munota wa 60 ikipe ya Cruzeiro ibona igitego cyaricyo cyari kibonetse muri uwo mukino.
Nyuma y’icyo gitego, Atlético Mineiro yakomeje gusatira cyane ishaka kwishyura, ariko bikanga. Umukino ugeze mu minota y’inyongera, ibintu byahindutse bibi ubwo umunyezamu wa Atlético Mineiro, Everson, yafashe umupira agahita atongana n’umukinnyi wa Cruzeiro witwa Christian.
Icyo gikorwa cyahise gituma abakinnyi b’amakipe yombi bashyamirana bikomeye, imirwano irakomera ndetse igera n’aho abari ku ntebe y’abasimbura binjira mu kibuga muri ayo makimbirane.
Nyuma y’iminota igera ku icumi imirwano isa n’icogoye, umusifuzi w’umukino Matheus Delgado yafashe icyemezo gikomeye cyo kwereka amakarita atukura abakinnyi benshi cyane. Aya makarita akaba yatanzwe ku bakinnyi 23.
Ku ruhande rwa Cruzeiro, abakinnyi 12 ni bo bayahawe, barimo Christian, Gerson, Fagner, Walace, Matheus Henrique, Cassio, Villalba, Kaua Prates, Joao Marcelo, Kaio Jorge, Romero na Fabricio Bruno.
Ikipe ya Atlético Mineiro yo yahawe amakarita atukura 11, arimo ayahawe Everson, Cassierra, Preciado, Minda, Ruan Tressoldi, Lyanco, Hulk, Franco, Alonso, Gabriel Delfim na Lodi.
Ibi byabaye amateka mashya mu mupira w’amaguru muri Brésil, kuko ari bwo bwa mbere mu mukino umwe hatanzwe amakarita atukura menshi angana atyo.
Nubwo bimeze gutyo, amateka y’isi aracyafitwe na Argentine. Mu mwaka wa 2011, mu mukino wahuje Claypole na Victoriano Arenas, umusifuzi Damián Rubino yatanze amakarita atukura 36, harimo 22 yahawe abakinnyi bari mu kibuga, mu gihe andi 14 bayahawe bari abasimbura n’abatoza.
