Ni umubyeyi ukunda kuganira, gusetsa, gutanga ibitekerezo ariko cyane cyane aharanira ko ntawarengana cyangwa arenganya areba. Ni impirimbanyi mu guharanira uburenganzira bw’umugore.
Pamela Mudakikwa ni inzobere mu itumanaho, akaba yaranakoze muri muri Minisiteri y’Uburinganire n’Iterambere ry’umuryango (MIGEPROF), ashinzwe imenyekanisha.
Mu butumwa yatanze akoresheje urubuga rwe Facebook, avuga ko rimwe mu masomo menshi kandi akomeye UBUZIMA bumaze kumwigisha mu gihe kiringaniye abumazemo, agira ati “UMUNTU NI NK’UNDI!”
Akomeza agira ati “Ntihazagire umuntu ukwiyemeraho mu buzima, ngo agucishe bugufi, agukandamize, agusuzugure, aguheze umwuka, agutere ubwoba, agucire urubanza akwigireho “umutagatifu” (abatagatifu baba mu ijuru by the way!). Burya na we afite inenge n’ubusembwa ahubwo ni uko muri ako kanya ibyawe ari byo bigaragaye ariko na we igihe cye kizagera! Twese turi abanyantege nke ndetse abatindi bo kubabarirwa: byaba byiza ‘GUCISHA MAKE!”
Mu butumwa bwe, Mudakikwa akomeza agira ati “Ntuzagire umuntu usuzugura muri ubu buzima ngo umuce amazi kubera uko asa, uko avuga, uko yambaye, amashuri yize, amafaranga afite cyangwa adafite, umuryango akomokamo n’ibindi… Uyu munsi uramurebera ku rutugu ngo ntimuri ku rwego rumwe ariko ejo uzamukenera! Aho umusuzuguye wicaye ejo yahagusimbura: ‘IBY’ISI NI GATEBE GATOKI!”
Avuga ko mu kubana n’umuntu buri wese akwiye kwizigama. Agira ati “Ntukagire umuntu wimariramo ngo uheze: abantu duhinduka nk’ikirere! Umwizere umwimariremo witeguye no kwirengera ingaruka (at your own risk!) Mwishimire, umubanire, umubitse ubutunzi n’amabanga witeguye kutazabyicuza! Wikwemera kuganzwa n’amarangamutima ejo utazaririra mu myotsi ngo ‘IYO MBIMENYA: URAMENYE!”
Agira inama abantu ko kwitwararika mu buzima ari iby’agaciro. Ati “Ntukagire umuntu uhutaza: Genda gake. N’ubwo yicecekeye ariko abitse byinshi. N’ubwo yiturije ariko afite amateka. Wimusagarira umubaza ibibazo bya mva he na njya he, umujyana hirya umugarura hino… Yifitiye imitwaro yikoreye, yifitiye ibikomere bimukomereye, na we afite byinshi yibaza adafitiye ibisubizo: ‘WIMUSONGA!”
Asaba buri wese kujya afata umwanya wo kubwira mugenzi we icyo ubuzima bwamwigishije, kuko hari isomo yakuramo ryamufasha mu rugendo rw’ubuzima kandi rigafasha n’abandi.
Ubwanditsi
