Kuri uyu wa kabiri tariki ya 8 Ugushyingo 2022, mu cyumba cy’inama n’amahugurwa mu kigo cy’urubyiruko cya Rwamagana habereye igikorwa cy’ubukangurambaga ku buzima bwo mu mutwe cyateguwe na GAERG–AHEZA binyuze mu kigo cyayo cy’Isanamitima n’ubudaheranwa (AHEZA Healing and Career Centre) giherereye mu murenge wa Ntarama mu Karere ka Bugesera.
Insanganyamatsiko y’ubu bukangurambaga igira iti “Uruhare rw’umuryango mu kubungabunga ubuzima bwo mu mutwe.”
Mu karere ka Rwamagana ubu bukangurambaga bwitabiriwe n’urubyiruko rusanzwe rukurikira amahugurwa yo kongererwa ubumenyi no kwihangira imirimo mu mushinga witwa YEEP (Youth Empowerment Economic Project) GAERG iterwamo inkunga na SURF (Survivors Fund). Uyu mushinga YEEP ukorera mu Mujyi wa Kigali no mu turere twa Rwamagana, Bugesera na Kayonza mu ntara y’Iburasirazuba.
Mu ijambo rye Umuyobozi wungirije ushinzwe imibereho myiza y’abaturage mu Karere ka Rwamagana, Madame UMUTONI Jeanne yashimiye GAERG (Group des Anciens Etudiants Rescapés du Génocide), uburyo yita ku mibereho y’abanyamuryango bayo n’uruhare igira mu kwita ku muryango mugari w’abarokotse Jenoside yakorewe Abatutsi.
Yakomeje avuga ko Umuryango ari inkingi ya mwamba mu kubungabunga ubuzima bwo mu mutwe, ukaba ishingiro n’igicumbi cy’ubuzima bwiza bwo mu mutwe. Yasabye uru rubyiruko gukomeza gukorera hamwe no gufatana urunana kuko ibibazo baciyemo n’ingaruka Jenoside yasize ari urugamba rutarwanywa n’umuntu umwe.
Yabasabye kandi gukomeza kubyaza umusaruro gahunda nziza z’Igihugu zigamije guteza imbere urubyiruko n’andi mahirwe abakikije.
Mu kiganiro cyatanzwe na NSENGIYUMVA Athanase, umuhanga mu by’ubuzima bwo mu mutwe, cyari gifite insanganyamatsiko igira iti “Uruhare rw’Umuryango mu kubungabunga ubuzima bwo mu mutwe” yasabye uru rubyiruko gukomeza kwitanaho, kwimenya no kwiyumva, bagashaka ubufasha mu gihe hari uwumva adatekanye.
Yababwiye ko uburwayi bw’ubuzima bwo mutwe buvurwa kandi bukira, ko kandi buri wese ashobora kugira ikibazo cy’ubuzima bwo mu mutwe; abasaba kugana serivisi z’ubuzima bwo mu mutwe igihe babonye hari ibimenyetso bigaragaza ko hari ibyahindutse bifite bimwe ibimenyetso biranga umuntu ufite ikibazo cy’ubuzima bwo mu mutwe.
Ibiganiro n’inyigisho kuri Serivisi z’ubuzima bwo mu mutwe bikazakomeza kugezwa ku banyamuryango ba GEARG n’umuryango nyarwanda muri rusange, kuko nta “buzima bwiza bwo mu mutwe nta terambere ryabaho”.
Panorama
