Haravugwa Imiwano ikaze hagati ya M23 na FARDC muri Masisi

Mu gihe akarere getegereje kubona ko M23 yubahiriza amasezerano yo guhagarika intambara no gusubira inyuma, amakuru agera kuri Panorama avuga ko imirwano yongeye gukomera ku cyumweru tariki ya 5 Werurwe 2023, hagati y’ingabo za DRC (FARDC) n’ inyeshyamba za M23 mu gace ka Masisi mu majyaruguru ya Kivu.

Imboni ya Panorama muri aka gace kabereyemo imirwano ivuga ko nyuma yo gushotorwa, inyeshyamba zagabye igitero ku birindiro bya FARDC byibuze ku mpande enye zikikije Sake, nko mu birometero mirongo itatu uvuye i Goma.

Ati “Byari Mu masaha ya saa kumi n’ebyiri za mu gitondo niho humvikanye urusaku rw’ amasasu menshi mu gace ka Kingi, ku murongo wa Sake-Kirolirwe-Kitshanga, mu midugudu ya Malehe na Neenero ku murongo wa Sake-Mushaki ndetse no mu mudugudu wa Karuba ku muhanda wa Sake-Ngungu. Ni mu misozi ireba umujyi wa Sake. Iyi mirwano yakomeje mu gitondo ku buryo nta muntu utambuka.”

Bamwe mu baturage bo muri ako gace bavuga ko FARDC ikomeje guhangana n’ inyeshyamba za M23, cyane mu duce twa Karuba ahari habareye imirwano ikaze mu cyumweru cyatambutse.

Hagati aho, abasivili bakomeje guterwa impungenge z’umutekano ku muhanda wa Kitshanga-Mwesso-Pinga. nk’uko aya makuru abitangaza, nyuma yo gufata Mwesso mu ntangiriro z’iki cyumweru, abarwanyi ba M23 bamaze kwerekeza i Kashuga no mu yindi midugudu ikikije ako gace k’ingenzi ka Bashali Mukoto.

Amakuru atugeraho akomeza avuga FARDC ifite impungenge nyinshi zo kuba abarwanyi ba M23 bashobora kwerekeza i Pinga (ni agace agizwe n’ishyamba rinini cyane) muri Teritwari ya Walikale ubwayo ifite ubwuso bungana na Kilometero kare 23,000.

Uku gusubukura imirwano bibaye mu gihe M23 yiyemeje, ku wa gatanu, tariki ya 3 Werurwe, imbere ya perezida wa ICGLR, guhagarika imirwano mu burasirazuba bwa DRC. Ibi, guhera kuwa kabiri, 7 Werurwe guhera sita z’amanywa (12h00).

Gaston Rwaka