Abanyamuryango ba FPR Inkotanyi mu kagari ka Gitaraga, mu murenge wa Masaka, mu karere ka Kicukiro, bishimira ko hari byinshi bagezeho harimo kubakira abana b’imfubyi, no guhanga imirimo isaga 400 muri yo isaga 300 yahangiwe abari n’abategarugori.
Mu bikorwa abanyamuryango ba FPR Inkotanyi bo muri Gitaraga bagaragaza ko bagezeho umwaka ushize kandi biri mu mihigo bahize, birimo kubakira abana b’imfubyi, kujyana abana mu marerero, gufatanya n’inzego z’ibanze gusubiza abana mu ishuri ndetse bahangira imirimo Abanyamuryango basaga 400 harimo abari n’abategarugori barenga 300 kandi bahembwa umunsi ku wundi. Bagize uruhare kandi mu gutanga mituweli ku batishoboye n’ibindi birimo gukangurira urubyiruko gukunda umuryango kandi bakawukorera.
Ibi byose byagarutsweho mu Nteko Rusange ihuza abanyamuryango buri mwaka, iba igamije kurebera hamwe ibyagezweho, bakongera no guhiga ibishya no gusabana hagati y’abayobozi n’abanyamuryango n’abandi baturage.
Ni igikorwa cyaranzwe n’impanuro n’inama zatanzwe n’abayoboye Umuryango FPR Inkotanyi ku nzego zisumbuye, ndetse hahembwe umudugudu wahize abandi mu gutanga umusanzu neza cyane ko ari nawo wabaga uwanyuma mu myaka yose yatambutse. Hashimiwe Rwiyemezamirimo wafashije abanyamuryango kwikura mu bukene ahangira imirimo abarenga 300 abandi abaha akazi.
Kagoyire Irene ni umuyobozi w’umudugudu wa Nyakarambi akaba n’umunyamuryango wa FPR Inkotanyi. Umudugudu we wahembewe gukora ubukangurambaga bwo kwitabira ibikorwa byinshi by’umuryango ari na wo shingiro ry’imibereho myiza y’abaturage.
Yagize ati “Nakoraga ntateganya ko nzahembwa, ahubwo mbikora kuko nishimiye ko ndi umunyamuryango ndetse w’umunyarwandakazi. Kugira ngo tugere kuri byinshi byiza ni ukwirinda gusigana, ahubwo tugakora tutikoresheje kuko umuturage wese areshya na mugenzi we; tugafatanya kuzamurana ndetse ukaba inshuti y’abo uyubora, tugakurikiza inama tugirwa n’abadukuriye. Ikindi utamwegereye ntiwamenya icyo akeneye.”
Ntazinda Ignace ni Rwiyemezamirimo utunganya Ikawa akayohereza hanze y’igihugu. Yishimira ko umusanzu we wo guha akazi abanyamuryango utabaye imfabusa, kuba abagore n’urubyiruko basaga 300 barabonye akazi.
Ati “Mu kazi ntanga ka buri munsi nibanda kuri bya byiciro bikeneye kuzamuka harimo abadamu n’urubyiruko, ariko ntitunibagirwa ababasha kuba badufasha ngo umurimo ubashe kunoga. By’umihariko nishimira ko nabashije guhanga akazi gatanga imirimo ikagirira n’abandi akamaro, atari njyewe njyenyine. Bakora neza kandi babasha kwiyishyurira mituweli, bitangira Ejo Heza ndetse banajyana abana babo kwiga. Turanateganya ko tuzongera guterana tugeze ku bantu magana arindwi.”
Chairperson w’Umuryango FPR Inkotanyi mu Kagari ka Gitaraga, Nkurunziza Julienne, yashimiye abanyamuryango bitanze mu bikorwa byose byagezweho muri uyu mwaka ushize, kuko atari kubasha kubikora wenyine ngo abishobore kandi hari byinshi biyemeje kuzakomeza kugeraho.
Yagize ati: “Dufite intego yo gukomeza gushishikariza abanyamuryango kwizigamira muri Ejo Heza kugira ngo bashobore kwiteza imbere mu buryo burambye, ntibanakomeze kuba umutwaro kuri Leta, aho usanga ifite abaturage benshi yishyurira amacumbi, abo yishyurira mituweli; abana kiga ari ibibazo. Ibi byose dukwiye kubyikorera niyo mpamvu tubakangirira gutangira kuzigamira abana babo hakiri kare ndetse nabo ubwabo bazagire ubuzima bwiza, nibwo tuzaba tugize uruhare mu guteza imbere igihugu cyacu.”
Yakomeje avuga ko urubyiruko narwo rwabafashije kubakira abatishoboye ubwiherero burenga 10, banubakiye abaturage uturima twigikoni turenga 50, banakoze ubukangurambaga bwo kwigisha bagenzi babo kwikura mu biyobyabwenge.
Munezero Jeanne d’Arc
