Ku wa Gatanu tariki 06 Ukwakira 2023, Umwalimu SACCO wifatanyije n’abatanga serivisi ku isi yose mu gusoza icyumweru mpuzamahanga cyahariwe umukiriya. Kuri uyu munsi, Umwalimu SACCO yahembye abanyamuryango bahize abandi mu kwizigamira no gukoresha neza inguzanyo bahawe na koperative. Ibirori byo gutanga ibihembo byabereye mu ntara zose no mu Mujyi wa Kigali.
Abanyamuryango bagera ku 100 b’indashyikirwa mu kwizigamira no gukoresha neza inguzanyo ni bo bahembwe mu gihugu hose, barimo 16 bahize abandi mu gukoresha neza inguzanyo. Muri bo batanu ni abo ku rwego rw’intara na ho 11 bari ku rwego rw’akarere. 29 bahize abandi mu kwizigamira, Ibimina na Koperative z’abarimu 23 zahize izindi mu kwizigamira ku rwego rw’akarere kimwe n’ibigo by’amashuri 30 byahize ibindi mu kubitsa amafaranga y’ishuri kuri konti zabyo ziri muri Umwalimu SACCO.
Ibihembo byatanzwe bifite agaciro ka miliyoni 43 z’amafaranga y’u Rwanda birimo ibikombe, moto na mudasobwa n’ibindi.
Moto 5 zahawe abanyamuryango babaye indashyikirwa mu gukoresha neza inguzanyo ku rwego rw’intara, mudasobwa zigendanwa 63 abo ku rwego rw’akarere, abahize abandi mu kwizigamira n’ibimina cyangwa koperative z’abarimu zahize izindi mu kwizigamira ku rwego rw’akarere; na ho ibikombe 30 byahawe ibigo by’amashuri byahize ibindi mu kubitsa amafaranga y’ishuri kuri konti zabyo ziri mu Umwalimu SACCO.
Umuyobozi Mukuru w’Umwalimu SACCO Madamu Laurence Uwambaje agira ati: “Ibi bihembo bigamije gushimira abanyamuryango b’indashyikirwa mu gukoresha neza inguzanyo no kwizigamira kubera ubudahemuka bagaragariza Umwalimu SACCO no kubashishikariza gukomeza gukorana na koperative yabo ndetse no gukomeza kuyigirira icyizere. Bigamije kandi gushishikariza abandi kubareberaho.”
Akomeza agira ati “Turashimira abanyamuryango uruhare bagira mu gufasha Umwalimu SACCO gutera imbere kandi tuboneyeho gushimangira ko twiyemeje gukora uko dushoboye kose kugira ngo ibyifuzo by’abanyamuryango bigerweho, dushyiraho ingamba nshya zo kubaha serivise zinoze. Tuboneyeho umwanya wo gushimira ibigo by’amashuri byigenga bikoresha cyane konti zabyo ziri mu Umwalimu SACCO. Ni umusanzu ukomeye baha koperative kandi turabibashimira cyane.”
Umuyobozi Mukuru w’Ikigo cy’Igihugu Gishinzwe Ibizamini n’Ubugenzuzi bw’Amashuri (NESA) Dr. Bernard Bahati wari Umushyitsi Mukuru akaba yari ahagarariye Minisiteri y’Uburezi mu birori byabereye mu Mujyi wa Kigali, ashima abanyamuryango b’indashyikirwa bahembwe kubera umuhate bashyize mu gukoresha neza inguzanyo no kwizigamira kugira ngo bagere ku iterambere. Ashishikariza kandi abanyamuryango b’Umwalimu SACCO gukoresha amahirwe bahawe yo kugira koperative yabo, kuko ari amahirwe akomeye abafasha kwiteza imbere no kuzamura imibereho yabo.
Mukaremera Marie Rose wahize abandi mu gukoresha neza inguzanyo mu Mujyi wa Kigali bigatuma ahembwa ipikipiki, ashimira Umwalimu SACCO uruhare igira mu kuzamura imibereho y’abarimu.
Agira ati: “Nishimiye serivisi z’Umwalimu SACCO n’uruhare rwayo mu kuzamura imibereho yacu. Nasabye inguzanyo mu mwaka wa 2017 kuko nashakaga kuzamura imibereho yanjye nka mwarimu. Iyo nguzanyo nayiguzemo inzu nto, nyuma nyihinduramo inzu y’ubucuruzi ifite imiryango itandatu. Amafaranga mbona muri iyo nzu y’ubucuruzi yahinduye ubuzima bwanjye mu buryo bufatika.”
Usibye guhemba abanyamuryango b’indashyikirwa, mu cyumweru cyahariwe umukiriya dushoje, Koperative Umwalimu SACCO yakoze ibikorwa bitandukanye mu mashami yayo yose, birimo: Guha impano abanyamuryango nk’ikimenyetso cyoroheje cyo kubashimira ubudahemuka bwabo; Gufata umwanya wihariye wo gusobanurira abanyamuryango ibikorwa na serivisi z’Umwalimu SACCO ndetse n’uburenganzira bw’abanyamuryango n’ibindi.
Icyumweru Cyahariwe Umukiriya cyizihizwa buri mwaka mu kwezi k’Ukwakira ni icyumweru mpuzamahanga kigamije kuzirikana akamaro ko gufata neza abakiriya ndetse no kwita ku batanga serivisi. Ni umwanya wihariye wo guteza imbere imitangire ya serivisi no gufasha abatanga serivisi kw’isi yose kwifatanya mu kwizihiza uruhare rukomeye gufata neza abakiriya bigira mu iterambere ry’ikigo icyo ari cyo cyose.
Ni muri urwo rwego, buri mwaka, Koperative Umwalimu SACCO yizihiza Icyumweru Cyahariwe Umukiriya hagamijwe gushimira abanyamuryango ubudahemuka n’icyizere bayigirira, ndetse no kuvugurura ingamba ubuyobozi bwa Koperative Umwalimu SACCO bwashyizeho zigamije gutanga serivisi zinyura abanyamuryango bayo.
Uyu mwaka, Icyumweru Cyahariwe Umukiriya cyatangiye kuva ku ya 2 Ukwakira kugeza ku ya 6 Ukwakira 2023 gifite insanganyamatsiko igira iti «Dushyire hamwe, tunoze serivisi».
Umwalimu SACCO ni Koperative yo Kuzigama no Kuguriza ihuriwemo n’abarimu n’abandi bakora mu nzego z’uburezi mu Rwanda. Yashinzwe mu mwaka wa 2006, Banki Nkuru y’Igihugu (BNR) iyiha icyangombwa cyo gukora nk’ikigo cy’imari mu Rwanda ku itariki ya 22 Gashyantare 2008.
Ibikorwa by’ingenzi by’iyi koperative ni ugukusanya ubwizigame bw’abanyamuryango no kubaha inguzanyo ku giciro kiri hasi ugereranyije n’ibindi bigo by’imari bikorera mu Rwanda.
Abanyamuryango b’Umwalimu SACCO ni abarimu bigisha mu mashuri ya Leta n’ayigenga akorera mu gihugu ndetse n’abakozi bo mu Rwego rw’Uburezi. Kugeza ubu, Umwalimu SACCO ifite abanyamuryango barenga 155,000 mu gihugu hose.
Panorama
