Ku wa Mbere tariki ya 13 Mata 2026, Umushumba Mukuru wa Kiliziya Gatolika ku Isi, Papa Leon XIV, yageze mu murwa mukuru wa Alger, mu gihugu cya Algeria, atangiza ku mugaragaro uruzinduko rwe rwa mbere ku mugabane wa Afurika kuva yatorerwa kuyobora Kiliziya muri Werurwe 2025.
Akigera muri iki gihugu, yakiriwe na Perezida wacyo, Abdelmadjid Tebboune, ku kibuga cy’indege mpuzamahanga cya Houari Boumediene. Biteganyijwe ko uru ruzinduko ruzamara iminsi 11, rukazamusiga azengurutse ibihugu bine byo kuri uyu mugabane.
Mu minsi ibiri ya mbere ari muri Algeria, Papa Leon XIV yagiranye ibiganiro n’abayobozi batandukanye, anasura urwibutso rw’intwari z’iki gihugu zaguye mu ntambara yo kwigenga yatangiye mu 1954 igasozwa mu 1962. Uru ruzinduko rugaragaza icyifuzo cyo gushimangira umubano hagati ya Kiliziya Gatolika n’ibihugu bifite amateka n’imiterere bitandukanye.
Algeria ifatwa nk’igihugu gifite umubare munini w’Abayisilamu, mu gihe Abagatolika ari bake cyane, ibintu bituma uru ruzinduko rubonwa nk’intambwe igamije guteza imbere ibiganiro n’ubwumvikane hagati y’amadini.
Abasesenguzi mu bya politiki bagaragaza ko uru rugendo rufite uburemere bwihariye, cyane cyane mu gushaka ibisubizo ku bibazo Afurika ihanganye nabyo, birimo imiyoborere y’umutungo kamere, ruswa, amakimbirane ashingiye ku madini ndetse n’ikibazo cy’abimukira bajya ku mugabane w’u Burayi.
Nyuma yo gusoza gahunda ze muri Algeria, Papa Leon XIV ateganya gukomereza uru ruzinduko rwe muri Cameroon ku wa 16 Mata, aho azahura n’abaturage n’abayobozi bahanganye n’ingaruka z’intambara imaze imyaka itari mike muri icyo gihugu. Azanakomereza ingendo ze muri Angola no muri Equatorial Guinea.
Uru ruzinduko rutegerejweho gutanga umusanzu mu gukomeza ibiganiro byubaka amahoro, guteza imbere ubufatanye no gushakira hamwe ibisubizo ku bibazo byugarije umugabane wa Afurika.
Papa Leo XIV yageze muri Algeria muruzinduko rwe rwa mbere ku mugabane wa Afurika
