Connect with us

Hi, what are you looking for?

Amakuru

UBUTUMWA BWA CESTRAR BUJYANYE N’UMUNSI MPUZAMAHANGA W’UMURIMO 2022

Bakoresha, Bakozi bagenzi banjye, bafatanyabikorwa mwese, 

Tubanje kubifuriza Umunsi Mukuru mwiza w’Umurimo  wizihizwa  ku  isi  hose  buri  tariki  ya  01  Gicurasi  ya  buri  mwaka,  aho  Leta, Abakoresha n’Abakozi bahura bagasuzumira hamwe intambwe imaze guterwa mu rwego rwo guteza imbere umurimo n’uburenganzira bw’abakozi, bagasuzuma ibibazo byagaragaye mu bihe bishize, bigashakirwa umuti ukwiriye kugira ngo umurimo urusheho kunozwa no gutezwa imbere.

Ni umunsi utwibutsa uburyo abakozi baharaniye uburenganzira bwabo ndetse bamwe bakahasiga ubuzima, n’abandi bagikomeza kuzira guhagararira no kuvuganira bagenzi babo, guhohoterwa ndetse bamwe bakanirukanwa mu kazi hirengagijwe amategeko abarengera.

Hashize igihe tudashobora  kwizihiza  umunsi  w’umurimo  nkuko  byari  bisanzwe  ngo  duhure  turi benshi, bitewe n’icyorezo cya Coronavirus.

Nubwo icyo cyorezo cyagabanyije ubukana ariko, ntabwo ari igihe cyo kwirara ahubwo turasaba abakozi bose n’abaturarwanda muri rusange gukomeza ingamba zo kwirinda, tukagihashya burundu.

Tukaba tuboneyeho  umwanya  wo  gushimira  Leta  y’u  Rwanda  n’abafatanyabikorwa  bose  ku mbaraga, ubwitange n’ubushishozi bakoranye mu gushyiraho ingamba nyazo kandi mu gihe gikwiye harimo no kugeza umubare  mu nini w’nkingo  ku batura Rwanda  benshi bashoboka. Turakomeza kandi  gushimira  cyane  abakozi  bagenzi  bacu  bo  mu  rwego  rw’ubuvuzi  berekanye  umurava n’ubunyamwuga bakarengera ubuzima bwa benshi mu bihe bitoroshye bya COVID 19.

Ibi byatumye  ubuzima  n’akazi  bigenda  bisubira  ku  umurongo  n’ubwo  hakiri  ingaruka  nyinshi dukomeje kugenda duhangana nazo cyane cyane ku birebana n’abakozi batakaje imirimo , n’ibindi.

Insanganyamatsiko y’uyu mwaka iragira iti : “ AHAZAZA H’UMURIMO INTEGO DUHURIYEHO”.

Nta terambere ryagerwaho hatabayeho ubufatanye  burambye  mu  gutegura  neza  ahazaza  h’umurimo; ibyo  bigakorwa  imirimo  ihari  isanzwe  ibanje  kunozwa,  igatanga  umusaruro  bityo  ikagirira  akamaro abayikora n’igihugu muri rusange.

Tukaba dushishikariza  abakozi  bose  gukorana  umurava,  guhora  bihugura  no  gukora  kinyamwuga; Abakoresha   nabo  barasabwa   kubahiriza   uburenganzira   bw’abakozi,   kubagenera   ibikoresho   bya  ngombwa  bibafasha  kunoza  umurimo,  kubagenera  amahugurwa  ajyanye  n’imirimo  bakora,  kubaha agaciro  nk’abafatanyabikorwa  no  guhora  bagenera    umwanya  uhagije  ibiganiro  rusange  hagamijwe gufata ingamba zo kunoza umurimo n’ubwumvikane mu kazi, biganisha kw’iterambere rirambye.

Gutegura neza ahazaza h’umurimo (Future of work) birasaba gutekereza ubundi buryo bwo gukora no guhanga imirimo.

Tukaba dushima Leta y’u Rwanda muri gahunda yayo yo guteza imbere ubumenyi ngiro hashingwa ibigo bya TVET mu gihugu hose. Uburezi n’inyigisho nabyo bitangwa mubindi bigo by’amashuri binyuranye bikwiye kujya bijyana n’ibikenewe kw’isoko ry’umurimo.

Guhanga udushya (Innovation), gushora imari no guteza imbere ikoranabuhanga nabyo ni bimwe mu bikorwa  by’ingenzi  bifasha  guhanga  umurimo  tukaba  dukangurira  urubyiruko  kuyobaka  iyo  nzira hatabayeho gutegereza undi uzabaha akazi nkuko byari bisanzwe bimenyerewe.

Turashishikariza ibigo by’imari gufasha urubyiruko kugera ku nguzanyo hagamijwe guhanga umurimo ariko tunasaba ko amafaranga y’inyungu yagabanywa k’uburyo bw’umwihariko mu bijyanye no gufasha urubyiruko rw’u Rwanda kwihangira imirimo.

Leta ikongerera ubushobozi ibigo byo kubigira imishinga no kubakurikiranira hafi kugirango intego baba biyemeje zigerweho.

Ku bijyanye n’imitangire y’akazi mu mucyo, turishimira intambwe imaze guterwa cyane cyane mu bigo bya Leta ariko dusaba ko byakomeza kunozwa ku buryo nta karengane mu itangwa ry’akazi kazabaho.

Ibihe turimo  byatwigishije  byinshi  harimo  no  kugira  umuco  wo  kuzigama  (Saving),  tukaba dushishikariza  abakoresha  bose  guha  abakozi  Kontaro  z’akazi  (Employment  contract)  zibaha ikizere   cy’akazi   bakanakigirirwa   n’ibigo   by’imiri   k’uburyo   bashobora   gusaba   no   guhabwa inguzanyo. Turasaba kandi abakoresha guhemba umushahara binyujijwe muri Banki nka bumwe mu buryo bw’ibanze bwo kubafasha kugira umuco wo kwizigamira.

Igice kinini cy’abakozi mu Rwanda  kiri hejuru ya 80%  kibarizwa mu  mirimo itanditse (Informal sector),  aba  bakozi  bahura  n’ibibazo  byinshi  harimo  kutarengerwa  bihagije  n’itegeko  rigenga umurimo  no  kutoroherezwa  kugira  ubwiteganyirize  bw’abakozi  (Social  Security)  bitewe  ahanini n’imiterere  y’itegeko  rirebana  n’ubwiteganyirize  bw’abakozi  mu  Rwanda;  turasaba  Leta  ko yashyiraho  gahunda  yo  guhindura  imiterere  y’iyo  mirimo  hagamijwe  kugira  imirimo  myinshi yanditse kandi irengerwa n’amategeko (Transition from Informal to Formal Economy). Turasaba ko hafatwa ingamba na  politiki  zihoraho  zo  guteza  imbere  imibereho  myiza  (Social  Protection) y’abakozi n’abaturage muri rusange nka rimwe mu masomo twakuye mu gihe k’icyorezo cya Covid-19.

Nk’uko tutahwemye kubigaragaza kuva mu myaka ishize, dukomeje gusaba ko Iteka rya Minisitiri rigena umushahara fatizo (Minimum wage) ritangazwa mu gihe cya vuba, bityo hakamenyekana umushara udashobora kugibwa munsi hagamijwe kurengera imibereho myiza y’abakozi.

Kutawugira bituma bamwe mu bakozi bakomeza guhembwa umushahara udahura n’ibiciro biriho kw’isoko   (coast   of   living),   cyane   ko   ariwo   wakagombye   gushingirwaho   mu   gihe   habaye imishyikirano hagati y’umukozi n’umukoresha ku bijyanye n’umushahara.

Twizihije  uyu  munsi  mpuzamahanga  w’umurimo  mu  gihe  hari  ibibazo  by’inshi  ku  isi  hose,  aho ingaruka zabyo zageze ku bicuruzwa byose. Muri iki gihe, umushahara w’abakozi usanzwe ari muto ntugishoboye guhangana n’ibiciro ku masoko ariko cyane cyane ibijyanye n’ingendo bajya cyangwa bava ku kazi aho ibiciro by’urugendo byiyongereye cyane, umushahara w’umukuzi ugashirira aho.

Nubwo  amikoro  y’igihugu  cyacu  atari  menshi,  turasaba  Leta  gukomeza  gusuzuma  icyakorwa kugirango ibiciro by’ingendo bidakomeza kuzamuka cyane, harimo no kuba ibikomoka kuri peterori byasonerwa  umusoro  mu  gihe  hagitegerejwe  ko  ibyo  bibazo  byazacyemuka,  kuko  uko  ibiciro bizamuka ariko imibereho y’umukozi irushaho guhungabana.

Ku bijyanye n’amafranga ahabwa abari mu kiruhuko cy ‘izabukuru, CESTRAR irahimira Leta ko amafranga  atangwa  buri  kwezi  yongerewe  n’ubwo  kuri  benshi  akiri  intica  ntikize  ugereranyije n’ibiciro  biriho  kw’isoko.Niyo  mpamvu  dusaba  ko  byakongera  bikigwaho  maze  amafranga  ya pansiyo  agahuzwa  n’ibiciro  biriho  kw’isoko  ndetse  akajya  yongerwa  ku  kigereranyo  cy’izamuka ry’imishahara y’abakozi ba Leta.

Hakwiye gusuzumwa kandi icyifuzo cya  benshi  basaba  ko  ikiruhuko  cy’izabukuru     k’ubushake cyashyirwa ku myaka 55 kuko byaha urubyiruko rurangije amashuri  amahirwe yo kubona akazi. .

Turasaba ko ikigo cy’Ubwiteganyirize RSSB cyajya cyunganira umuryango  w’uwiteganyirije  uri muri pansiyo mu kumuherekeza neza igihe yitabye Imana.

Turishimira cyane ko ikibazo cy’ibirarane by’umushahara w’abakozi basaga 1,800 bahoze bakorera EWASA cyari kimaze igihe kirekire cyacyemutse binyuze mu bwumvikane n’imishyikirano bakaba barishyuwe  arenga  miriyari  icumi  z’amafaranga  y’Urwanda  (10,000,000,000FRW) ;  turashimira inzego zose zabigizemo uruhare mu gucyemura icyo kibazo.

Turizera   kandi   ko   n’ibijyanye   na   pansiyo   yabo   ishingiye   kuri   ibyo   birarane   bizakemurwa bagasubizwa uburenganzira bwabo bwuzuye.

Twifurije abakozi n’abaturarwanda bose Umunsi Mukuru mwiza w’Umurimo !!!

Mugire amahoro

Urugaga rw’Amasendika y’Abakozi mu Rwanda ‘CESTRAR’

Click to comment

Leave a Reply

Your email address will not be published.

Izindi wakunda

PanoramaTV Rwanda

https://www.youtube.com/watch?v=BgBhZVIypEs

Click here to Follow our YouTube Channel

Advertisement

Address:

KG 17 Av 37
Remera-ARJ/RMC House
Amahoro National Stadium
Registration Number: RMC/C/14/015
Accreditation: RURA/ICT/LIC/210181745

e-mail: editor.panorama.rw@gmail.com; panoramarw@gmail.com

Tel: 0788300359 -0733003020

Twitter: @PanoramaNewspa1; @reneanthere
Facebook: Panorama Newspaper

Services:

Panorama Newspaper, Animation, Conducting Community debates, Organizing Talk shows, Consultancy in Media, Photography, Newsletters, Magazines, Videos, Documentaries, Translation, Editing, Book publishing, Motion picture, video and television programme production activities, Motion picture, video and television programme postproduction activities
Motion picture, video and television programme distribution activities, Motion picture projection activities, Other information service activities n.e.c.
Other publishing activities, Publishing of newspapers, journals and periodicals
Radio broadcasting, Television programming and broadcasting activities

Copyright © 2021 Panorama.