Izamuka ry’ibiciro by’ibiribwa ku isoko rihangayikishije benshi

Amakuru aturuka ku masoko hirya no hino mu Rwanda agaragaza ko ibiciro by’ibiribwa bikomeje kuzamuka, ku buryo mu gihe kitarenze amezi 6 hari ibiciro by’ibiribwa bimaze kwikuba inshuro ebyiri zose.

Nyirabeza Anastasia, atuye mu Karere ka Gatsibo, mu murenge wa Rugarama, Akagari ka Rwagitima, asanzwe atunzwe n’ubuhinzi. Yavuze ko ibiciro by’ibishyimbo ku isoko biteye ubwoba kuko byikubye inshuro eshatu.

Ati “Ku myaka 51 mfite, nibwo bwa mbere mbonye ibiciro bimeze bitya aho ikiro cy’ibishyimbo kigeze ku mafaranga y’u Rwanda ibihumbi bitatu, ntibyigera biba!”

Yavuze kandi byageraga igihe cy’ihinga bagifite imbuto kandi ibishyimbo bikiri ku mafaranga make atarenze Magana atanu.

Panorama yasuye amasoko yo hirya no mu Ntara yanasaguriraga Umujyi wa Kigali. Nka Nyagatare ibishyimbo bigeze ku mafaranga 1000, amavuta y’ubuto litiro ni amafaranga y’u Rwanda 1000, gusa aho umuceri uciriritse uracyari ku mafaranga 900.

Ku masoko atandukanye mu Mujyi wa Kigali, ibishyimbo biracyari ku mafaranfa igihumbi ariko umuceri waguraga amafaranga 1000 naho ugeze ku mafaranga hagati ya 1400 na 1500.

U Rwanda rufite abaturage bangana na 13,674,021, nk’uko tubikesha igipimo Worldmeter gikorwa n’ibarurishamibare ry’Umuryango w’Abibumbye cyo ku wa mbere tariki 3 Ukwakira 2022. 

Ubusesenguzi bwihariye bwa Panorama busanga iki kibazo cy’izamuka ry’ibiciro ku isoko ahanini riterwa n’Ubwiyongere bukabije bw’ abantu (Demographie galopante), kuko bushobora gutuma ibisabwa ku isoko biba bikeya kurusha ibihari (Offre//Demande), kuko imibare igaragaza ko buri mwaka havuka abana bangana n’umubare utuye Akarere ka Gatsibo.

Ikibazo cy’imiturire itanoze aho ubutaka bwagombaga guhingwa bugatanga umusaruro w’imyaka yahaza abaturage, usanga bwarubatsweho amazu abantu batuyeho ubundi kubona ibiribwa bigatangira kuba ihurizo.

Kuba mu bihugu bituranye n’u Rwanda bitagemura ibiribwa nk’uko byahoze, ku ruhande rumwe ni ikibazo ariko na none n’abo baturanyi basangiye ikibazo cy’izamuka ry’ibiciro by’ibiribwa ku masoko bifitanye isano n’izamuka ry’ibikomoka kuri Petelori.

Aganira na Panorama, Dr Canisius Bihira nk’umuhanga mu bukungu yavuze ko muri ibi bihe ntawakwirengagiza ko ikibazo cy’ibiciro ku isoko bibangamiye imibereho y’abantu.

Ati “Ntabwo ari umwihariko ku gihugu cyacu gusa, kuko ibi bituriho biri no mu bihugu byateye imbere na USA, France n’ahandi. Iki turagisangiye ku bihugu byose kandi bifitanye isano n’iriya ntambara yo muri Ukraine, yaje mu gihe ibihugu byari bitaramara kuva mu ngorane twatewe na COVID-19.”

Yakomeje avuga ko aramutse avuze uko abibona, asanga iri zamuka ry’ibiciro, n’ubwo turibona ubu mu Rwanda, tutavuga ko biterwa na ”Demographie galopante” kubera ko uyu mwaka ataribwo tugize abaturage benshi. Yewe n’imiturire ntiyaba intandaro, kuko ntacyahindutse cyane gitunguranye.

Dr Canisius Bihira yanavuze kandi ko mu bihe biri imbere, impamvu dukeka y’izamuka ry’ibiciro rikara nk’ubwiyongere bukabije bw’abantu n’imiturire itanoze, aho abantu bubaka amazu aho bakagombye guhinga ibibatunga bishobora kuazarusaho guhungabanya ihame ry’isoko (Offre & Demande).

Twifuje kumenya icyo Minisiteri y’Ubucuruzi ivuga kuri iki kibazo cy’izamuka ry’ibiciro gihangayikishije abaturage, tugerageza kuvugana na Minisitiri w’Ubucuruzi n’inganda ariko ntiyagira icyo atubwira ariko twamwohereje ubutumwa twizeye ko igihe cyose aza guhuguka hari icyo adutangariza.

Gaston Rwaka