Rene Anthere Rwanyange
Kuri uyu wa Kane tariki ya 7 Gicurasi 2026, hirya no hino mu gihugu hatangijwe amarushanwa yo Gusoma ibitabo bitoza abana b’u Rwanda Indangagaciro mu iterambere ry’uburezi bufite ireme.
Abanyeshuri bahawe gusoma ibitabo birimo: Inkuru ya Rwigema (Igitabo gitoza indangagaciro y’ubutwari); Inkuru y’Inkotanyi Tito (Igitabo gitoza indangagaciro y’Urukundo rw’Igihugu, Ubutwari n’Ubunyarwanda..); Nkunda Igihugu cyanjye (Igitabo gutoza Gukunda Igihugu); Rukundo na Shyaka (Igitabo gitoza kurangwa n’urukundo rw’Igihugu n’Ishyaka ryo kubaka u Rwanda); Rwanda Nkunda, Papa Mama n’abana baganira ku Rwanda; Umwari ubereye u Rwanda; Urubyiruko Dufitanye Igihango; Inkotanyi ntatezuka Tito Rutaremara; Kagame Paul Imbarutso y’ubudasa bw’u Rwanda; Umukozi ubereye u Rwanda n’ibindi bitandukanye.
Aya marushanwa yateguwe n’Ishyirahamwe ry’Uruganda rw’Igitabo mu Rwanda (RWABIA) ku bufatanye na Minisiteri y’uburezi (MINEDUC), Ikigo cy’igihugu gishinzwe uburezi (REB), Ikigo cy’Igihugu cy’imyuga n’ubumenyingiro (RTB), PAM-RWANDA, Urugaga rw’abanditsi n’abandi.
Umuyobozi w’Ishyirahamwe ry’uruganda rw’ibitabo mu Rwanda (RWABIA), Hategekimana Richard, avuga ko nta kindi cyiza u Rwanda rwahisemo guha abana barwo uretse Indangagaciro zibafasha kuzakurana u Rwanda bagakura bakunda igihugu cyabo ari Abanyarwanda beza.
Agira ati “Nyakubahwa Perezida wa Repubulika Paul Kagame iteka asaba abarezi bose kubaka uburezi bubereye u Rwanda, uburezi butarimo ubukoroni, Integanyanyigisho Nyarwanda.
Ni muri urwo rwego ibitabo byateguwe mu marushanwa biri mu murongo wa Nyakubahwa Perezida wa Repubulika wo kubaka Umunyarwanda ubereye u Rwanda.”
Amarushanwa arahera ku rwego rw’Ishuri uyu munsi, azakomereze ku rwego rw’Umurenge, Akarere, Intara /Umujyi wa Kigali ndetse no kurwego rw’Igihugu.
Hategekimana akomeza avuga ko abazahiga abandi bazahabwa ibihembo birimo Miliyoni y’Amafaranga y’u Rwanda, Imidari, Ibikombe, ibitabo n’ibindi bihembo bishimishije.
Hategekimana Richard ashimira abayobozi b’ibigo by’amashuri byaguriye abana ibitabo ndetse bikiyemeza kwitabira amarushanwa, ariko akanavuga ko hari abayobozi b’ibigo by’amashuri badakozwa iyi gahunda, batayumva na gato harimo na bamwe mu bayobozi bashinzwe uburezi batabyumva neza, akavuga ko bigoranye ko abana bose bazagerwaho n’aya mahirwe.
Indirimbo yubahiriza igihugu uvuga ko ururimi rw’Ikinyarwanda ko ari rwo ruduhuza bityo rero buri wese ufite uburezi mu nshingano ze akwiye kumva neza akamaro k’ibitabo bitoza abana b’u Rwanda indangagaciro na kirazira.
