Ikigo cy’Igihugu Gishinzwe Ibizamini n’Ubugenzuzi bw’Amashuri (NESA) cyatangaje ko amanota y’ibizamini bya Leta bisoza amashuri abanza (PLE) n’icyiciro rusange cy’amashuri yisumbuye (O-Level), by’umwaka w’amashuri wa 2025/2026, azatangazwa ku wa 20 Kanama 2026.
Nk’uko NESA yabitangaje, ayo manota azatangazwa saa munani z’amanywa, ni ukuvuga saa 2:00 PM.
NESA yatangaje ko iri tangazo rigenewe abanyeshuri bakoze ibi bizamini, ababyeyi n’abarezi, abayobozi b’amashuri ndetse n’abandi bafatanyabikorwa mu burezi, kugira ngo bamenye igihe nyacyo amanota azatangarizwa.
Abanyeshuri bakoze ibizamini bya PLE n’O-Level barasabwa gukurikirana itangazwa ry’amanota ku gihe, mu gihe ababyeyi n’abarezi basabwa kuba hafi y’abanyeshuri no kubafasha mu gihe bamenye umusaruro babonye.
NESA kandi yamenyesheje abifuza gukurikira umuhango wo gutangaza aya manota ko uzanyuzwa ku muyoboro wa YouTube wa Minisiteri y’Uburezi (MINEDUC) ndetse no ku wa NESA.
Itangazwa ry’aya manota rizaba ari intambwe ikomeye ku banyeshuri barangije amashuri abanza n’icyiciro rusange, kuko rizabafasha kumenya uko batsinze no gutegura icyiciro cy’amashuri bakurikizaho.
Itariki: Ku wa 20 Kanama 2026
Igihe: Saa 2:00 PM
Ibizamini: PLE n’O-Level
Umwaka w’amashuri: 2025/2026
