Ikipe ya APR FC yamaze kumenyesha Ishyirahamwe ry’Umupira w’Amaguru mu Rwanda, FERWAFA, ko ititeguye kwitabira irushanwa rya Super Cup mu buryo bushya bwemejwe muri uyu mwaka.
APR FC yandikiye FERWAFA iyimenyesha ko idashaka gukina iyi Super Cup izitabirwa n’amakipe ane, nyuma y’uko FERWAFA ihinduye uburyo iri rushanwa ryakinwagamo.
Ubusanzwe Super Cup yahuzaga amakipe abiri, ariyo yatwaye Shampiyona y’Icyiciro cya Mbere n’iyatwaye Igikombe cy’Amahoro. Ariko muri uyu mwaka, FERWAFA yemeje ko irushanwa rizakinwa n’amakipe ane arimo APR FC, Rayon Sports, Kiyovu Sports na Police FC.
APR FC ivuga ko ititeguye gukurikiza ubu buryo bushya kuko yari yarateguye gahunda ishingiye ku mukino umwe wayihuza na Rayon Sports, nk’uko byari bisanzwe bigenda.
Ikipe kandi yagaragaje ko impinduka zatangajwe zitinze, ku buryo yari yamaze gukora izindi gahunda zayo. Yongeyeho ko amakipe agomba gukina iri rushanwa atigeze aganirizwa mbere y’uko hafatwa iki cyemezo.
APR FC isanga niba FERWAFA ishaka guhindura imiterere ya Super Cup, byakwiye gutangira gukurikizwa mu mwaka utaha kugira ngo amakipe abimenyeshwe hakiri kare kandi abone umwanya uhagije wo gutegura gahunda zayo.
FERWAFA yatangaje ko igiye gusuzuma ubusabe bwa APR FC, hanyuma ikazatangaza icyemezo nyuma y’ibiganiro n’inzego bireba.
