Ikipe ya RSSB Tigers BBC ihagarariye u Rwanda mu mikino ya nyuma ya Basketball Africa League (BAL) 2026, yatangiye neza iri rushanwa nyuma yo gutsinda FUS Rabat yo muri Maroc amanota 95 kuri 72 mu mukino wabereye muri BK Arena i Kigali.
Uyu mukino wabaye ku wa Gatanu tariki ya 22 Gicurasi 2026, waranzwe n’imikinire yo ku rwego rwo hejuru ku ruhande rwa RSSB Tigers BBC, yagaragaje imbaraga kuva umukino utangiye kugeza urangiye.
Umukinnyi Leonard Craig Randall II ni we wigaragaje cyane muri uyu mukino, aho yatsinze amanota 38 wenyine, aba umukinnyi watsinze amanota menshi muri uwo mukino. Randall yafashije cyane ikipe ye mu buryo bwo gutsinda amanota no kuyobora umukino, ibintu byatumye abafana benshi bamwerekeza ho amaso.
Ku ruhande rwa Mangok Mathiang, yitwaye neza mu gufata imipira iva ku nkangara (rebounds), aho yakoze rebounds 15, afasha ikipe ye kugenzura umukino no kubuza FUS Rabat kubona uburyo bwinshi bwo kongera amanota.
RSSB Tigers BBC yagaragaje ubufatanye bwiza hagati y’abakinnyi ndetse n’ubwirinzi bukomeye, byatumye FUS Rabat igorwa no kubona uburyo bwo kwinjiza amanota byoroshye.
Abafana bari bitabiriye uyu mukino muri BK Arena bashimye uburyo ikipe ihagarariye u Rwanda yatangiye iri rushanwa, bavuga ko iri kugaragaza ubushake bwo kugera kure muri BAL 2026.
Uyu mukino kandi wabaye intangiriro nziza ku Rwanda rwongeye kwakira imikino ya nyuma ya BAL, amarushanwa akomeje kugenda akurura abafana benshi ba Basketball muri Afurika no hanze yayo.
Nyuma y’uyu mukino, harakurikiraho indi mikino irimo uwa Club Africain yo muri Tunisia iza guhura na Al Ahly Ly yo muri Libya saa cyenda z’umugoroba, mbere y’uko Atlético Petróleos de Luanda yo muri Angola ikina na Dar City yo muri Tanzania.
RSSB Tigers BBC na FUS Rabat biteganyijwe ko bazongera guhura ku Cyumweru tariki ya 24 Gicurasi 2026, mu mukino utegerejwe n’abakunzi ba Basketball benshi bashaka kureba niba ikipe y’u Rwanda yakomeza umuvuduko mwiza yatangiranye iri rushanwa.
Abasesenguzi ba Basketball bavuga ko intsinzi nk’iyi itanga icyizere ku ikipe ya RSSB Tigers BBC, cyane cyane ko iri gukinira imbere y’abafana bayo, ibintu bishobora kuyifasha gukomeza kwitwara neza mu mikino iri imbere ya BAL 2026.
