Wilson Nsabamahoro
Ku mugoroba wo ku wa 16 Mata 2024, Paris Saint Germain na Borussia Dortmund zageze muri ½ cya UEFA Champions League nyuma yo gusezerera FC Barcelona na Atletico Madrid.
Paris Saint Germain yasezereye FC Barcelona na ho Borussia Dortmund igasezerera Atletico Madrid. Paris Saint Germain ya Luis Enrique yasezereye Barcelona ku kinyuranyo cy’ibitego 6 kuri 4. Dortmund yo yakuyemo Atletico ya Diego Simeoni ku kinyuranyo cy’ibitego 5 kuri 4.
Amakipe yakomeje ntabwo yari yatsinze imikino ibanza. Paris Saint Germain yari yatsinzwe na FC Barcelona ibitego 3-2 na ho Borussia Dortmund yari yatsinzwe na Atletico Madrid igitego 2-1.
Umutoza wa Barcelona n’abasore be bari baje biteguye gusezerera PSG cyane ko bari mu rugo. Kurinda igitego barushaga Paris Saint Germain byatangiye bibahira ku buryo ku munota wa 12 babonye igitego cyatsinzwe na Raphinha. Ako kanya umwuka wari mwiza ku ruhande rw’abafana ba Barcelona bari bizeye ko kujya imbere ibitego bibiri bibongereye amahirwe yo gukomeza.
Ibyishimo ntibyamaze kabiri kuko umunota wa 29 wazanye umwijima w’icuraburindi ku bakunzi ba Barcelone. Nyuma y’uko umunya Uruguay Ronald Araujo akuruye Barcelona akamuvutsa amahirwe yo gutsinda igitego byatumye umusifuzi yereka ikarita itukura uyu myugariro wa Barcelona.
Nyuma y’ikarita itukura abasore ba Barcelona bagowe n’ubusatirizi bwa Paris Saint Germain. Bidatinze ku munota wa 40 Paris Saint Germain itsinda igitego cya Osmane Dembele amakipe ajya kuruhuka anganya 1 kuri 1.
Igice cya kabiri cyatangiranye imbaraga ku ruhande rwa Paris Saint Germain ari na ko abasore ba Barcelona birwanaho nubwo byari bigoye. Bidatinze ku munota wa 54, Vitinha yatsindiye Paris Saint Germain igitego cya kabiri. Iki gitego cyakurikiwe n’ibitego bibiri byatsinzwe na Kylian Mbappe. Kimwe ku munota wa 61 kuri penaliti n’ikindi ku munota wa 89 cy’agashinguracumu. Umukino urangira FC Barcelona itsinzwe na Paris Saint Germain 4-1 byose hamwe biba 6-4 ikomeza muri ½.
Urusaku rwinshi rw’abafana bari kuri Sitade Signal Iduna Park ntirwemereye Atletico Madrid kwikura mu Budage. Impamba ya 2 kuri 1 ntiyari ihagije kuri Diego Simeoni n’abasore be. Ibi byatumye batsindwa na Dortmund y’umutoza Eden Terzic ibitego 4 kuri 2 basezererwa gutyo.
Umutoza wa FC Barcelona Xavi Hernandez ntiyishimiye imisifurire habe na gato. Imisifurire na yo ntiyamwishimiye kuko yahawe ikarita y’umutuku ajya kwicara mu gice cy’abanyamakuru.
Imikino ibiri isigaye ya ¼ cya UEFA Champions League irakomeza iri joro saa tatu zuzuye. Arsenal irasura Bayern Munich mu Budage kuri Sitade Allianz Arena. Ikipe zombi zari zanganyije 2 kuri 2 mu mukino ubanza.
Amaso yose ari ku mukino Man City ya Pep Guardiola ibitse igikombe giheruka yakiramo Real Madrid saa tatu z’ijoro Etihad. Umukino ubanza Santiago Bernabeu, City yari yaguye miswi na Real Madrid ibitego 3 kuri 3. Ubwo zahuriraga muri ½ umwaka ushize Manchester City yakuyemo Real Madrid ku giteranyo cy’ibitego 5 kuri 1.
Muri ½ Dortmund izahura na Paris Saint Germain na ho ikomeza hagati ya Man City na Real Madrid ihure n’ikomeza hagati ya Bayern Munich na Arsenal.
