Abafite imitungo itandukanye mu Rwanda, guhera ku nzu zo guturamo, ubutaka, inyubako z’ubucuruzi, amahoteri n’ibinyabiziga, bagiye kujya bishyura ibiciro bishya mu gihe basabye serivisi zo kugena agaciro k’imitungo yabo.
Ibi bikubiye mu miterere y’ibiciro byo kugena agaciro k’umutungo y’umwaka wa 2026, yatangajwe n’Urugaga rw’Abakora Umwuga wo Kugena Agaciro k’Umutungo Utimukanwa mu Rwanda (IRPV). Urubuga rw’uru rugaga rugaragaza ko iyi miterere mishya y’ibiciro iri mu nyandiko zemewe za 2026.
Icyakora, nyuma y’inkuru yasohowe n’Ikinyamakuru The New Times ku wa 26 Kanama 2026 ivuga kuri ibi biciro, Ikigo cy’Igihugu Gishinzwe Ubutaka (NLA) cyasobanuye ko hari aho inkuru yakoresheje imvugo ishobora kuyobya abantu.
NLA yavuze ko ibiciro byo kugena agaciro k’umutungo bitagenwa cyangwa ngo byemezwe na NLA, ahubwo byemezwa n’Inama Ngengamikorere y’Urugaga rw’Abakora Umwuga wo Kugena Agaciro k’Umutungo Utimukanwa mu Rwanda (IRPV Regulatory Council). NLA yagaragaje kandi ko Umuyobozi Mukuru wayo ari we ukuriye iyo nama.
Inzu isanzwe izatangirwa igenagaciro kuva ku bihumbi 90 Frw
Mu biciro bishya, igenagaciro ry’inzu isanzwe y’umuryango umwe itubatse hejuru y’ikindi cyiciro, rizatangirira ku 90,000 Frw.
Ku nzu ifite igorofa rimwe hejuru y’iryari hasi, izwi nka G+1, igenagaciro rizatangirira ku 200,000 Frw. Ikiguzi kandi gishingira ku buso bw’inyubako, aho hateganyijwe igipimo cya 1,000 Frw kuri metero kare y’inyubako, bitewe n’icyiciro cy’umutungo.
Ku mazu ya condominium, igice cy’umuntu umwe gifite igorofa imwe kizatangirira ku 90,000 Frw, mu gihe gifite amagorofa abiri kizatangirira ku 200,000 Frw. Buri gorofa yongerwaho nyuma yaho izongeraho 50,000 Frw.
Ubutaka na bwo bwashyiriweho ibiciro bishya
Ku butaka butarubatse bufite ubuso buri munsi ya hegitari imwe, igenagaciro rizajya ritangirira ku 70,000 Frw.
Ku butaka bungana na hegitari imwe cyangwa burenga, ikiguzi fatizo ni 100,000 Frw, hakiyongeraho 7 Frw kuri metero kare. Ibi biciro binareba ubutaka bw’ubuhinzi, ubworozi n’amashyamba.
Ku nyubako z’ubucuruzi, igenagaciro ry’inyubako ifite igorofa rimwe ritangirira ku 150,000 Frw, mu gihe inyubako ya G+1 itangirira ku 200,000 Frw, hakiyongeraho igipimo cya 1,000 Frw kuri metero kare n’ibindi biteganywa bitewe n’umubare w’amagorofa.
N’amahoteli n’ibinyabiziga birarebwa
Ibiciro bishya binareba amahoteli, aho igenagaciro fatizo ritangirira kuri miliyoni imwe y’amafaranga y’u Rwanda ku hoteli y’inyenyeri imwe, rikagera kuri miliyoni umunani ku ya 5-star.
Ku binyabiziga, amakuru yatangajwe agaragaza ko igenagaciro ry’imodoka bwite rizajya ritwara 60,000 Frw, mu gihe bisi n’amakamyo bizishyura 100,000 Frw, naho moto zikishyura 50,000 Frw.
Ibiciro bishya bisimbura ibyariho kuva mu 2018
IRPV ivuga ko iyi miterere mishya y’ibiciro yasimbuye iyari isanzwe ikoreshwa kuva mu 2018. Impinduka zaje mu gihe ibiciro by’ibikorwa bitandukanye, ubwikorezi n’ibindi bikoresho byiyongereye, ibintu byagendeweho mu kuvugurura ibiciro byo gutanga serivisi zo kugena agaciro k’umutungo.
Ibi biciro bikurikizwa mu gihugu hose, haba ku igenagaciro rikorwa ku mitungo ya Leta cyangwa iy’abikorera. Ikindi, ibiciro byashyizweho birimo imisoro.
Hashakwa gukumira abatari abagenagaciro babifitiye uburenganzira
IRPV kandi yatangaje ko iri gutegura uburyo buzafasha abafite imitungo kubona abagenagaciro bafite ibyangombwa no kumenya ibiciro byemewe, mu rwego rwo kurwanya abantu biyitirira abagenagaciro, kwaka amafaranga arenze ayagenwe cyangwa kugena agaciro k’umutungo ku bushake.
Urugaga rufite kandi urutonde rw’abagenagaciro bemewe gukora uyu mwuga mu 2026, ndetse n’urutonde rw’ibigo byemewe gutanga serivisi zo kugena agaciro k’umutungo.
Muri rusange, impinduka z’ibiciro zigamije gushyiraho umurongo umwe mu igenagaciro ry’imitungo mu Rwanda no kurushaho guteza imbere umwuga w’abagenagaciro ukorwa mu buryo bw’umwuga kandi bugenzurwa. IRPV yashinzwe mu 2010 kandi ifite inshingano zo guteza imbere no kugenzura umwuga wo kugena agaciro k’umutungo utimukanwa mu Rwanda.
