Panorama Sports
Ishyirahamwe ry’Umupira w’Amaguru mu Rwanda, Rwanda Football Federation, ryatangaje ko umutoza w’umwongereza Stephen Constantine yagizwe umutoza mukuru w’Ikipe y’Igihugu y’Abagabo, Rwanda national football team. Uyu mutoza kandi azaba anatoza Ikipe y’Igihugu y’Abatarengeje imyaka 23 mu gihe cy’imyaka ibiri iri imbere, hashingiwe ku musaruro azagaragaza.
Mu itangazo rigenewe itangazamakuru, FERWAFA yavuze ko ishyirwaho rya Constantine rigamije gukomeza guteza imbere umupira w’amaguru mu Rwanda no kubaka ikipe y’igihugu ifite imbaraga n’ubushobozi bwo guhangana ku rwego mpuzamahanga. Ubuyobozi bw’iri shyirahamwe bwagaragaje ko bufitiye icyizere uyu mutoza mushya bitewe n’ubunararibonye afite mu gutoza amakipe y’ibihugu bitandukanye.
Biteganyijwe ko Stephen Constantine azatangira inshingano ze ku mugaragaro ku wa Mbere tariki ya 16 Werurwe 2026. Kuva uwo munsi, azahita atangira gukorana n’abagize tekinike y’ikipe y’igihugu mu myiteguro y’amarushanwa ya FIFA Series ateganyijwe kubera i Kigali mu mpera z’uku kwezi kwa Werurwe.
FERWAFA yatangaje ko amakuru arambuye ku mutoza mushya, ku bagize itsinda rya tekinike ndetse no ku cyerekezo gishya cy’ikipe y’igihugu azatangarizwa mu kiganiro n’abanyamakuru kizaba mu cyumweru gitaha.
Ishyirwaho rya Constantine ritezweho kuzana impinduka mu mikinire y’Amavubi no kuyafasha kongera kwitwara neza mu marushanwa mpuzamahanga. Abafana b’iyi kipe na bo bagaragaza icyizere ko uyu mutoza mushya azafasha Amavubi kugera ku rwego rushimishije mu mikino iri imbere.
Bucyibaruta Nkubiri Robert
