Perezida wa Repubulika y’u Rwanda, Paul Kagame, yageze muri Oman aho yatangiye uruzinduko rw’akazi rw’iminsi ibiri rugamije kurushaho guteza imbere umubano n’ubufatanye hagati y’ibihugu byombi.
Perezida Kagame yageze ku Kibuga cy’Indege cya Royal Airport i Salalah ku wa 7 Nzeri 2026, yakirwa n’Umuyobozi w’Intara ya Dhofar hamwe n’abandi bayobozi bakuru ba Oman.
Uru ruzinduko rubaye mu gihe umubano hagati y’u Rwanda na Oman umaze kwaguka, cyane cyane mu nzego z’ubukungu, ikoranabuhanga, ubwikorezi n’ibikorwa remezo.
Ibihugu byombi byatangiye umubano w’ububanyi n’amahanga mu 1982, ariko kuva mu myaka ibiri ishize ubufatanye bwabyo bwatangiye gufata indi ntera.
Muri Mutarama 2026, Minisitiri w’Ububanyi n’Amahanga n’Ubutwererane Mpuzamahanga w’u Rwanda, Olivier Nduhungirehe, yagiriye uruzinduko muri Oman aherekejwe n’abandi bayobozi bakuru. Muri urwo ruzinduko, ibihugu byombi byasinyanye amasezerano arebana n’indege, ibikorwa remezo by’ikoranabuhanga, ibigo bibika amakuru ndetse n’ubwikorezi.
Mu bijyanye n’ibikorwa remezo by’indege, u Rwanda n’Oman byagaragaje ubushake bwo guteza imbere ubufatanye hagati y’Urwego rw’Igihugu rw’Iterambere (RDB) na Oman Airports Management Company. Ubu bufatanye bugamije kungurana ubumenyi, kunoza imicungire y’ibikorwa remezo by’indege no gushaka amahirwe mashya y’ishoramari.
Ibihugu byombi kandi byagaragaje ko bishaka gukomeza gukorana mu bijyanye n’ubwikorezi bw’ibicuruzwa, ibyambu by’ubutaka ndetse n’imicungire y’uruhererekane rw’ibicuruzwa.
Ikoranabuhanga na ryo riri mu byiciro by’ingenzi by’ubufatanye. Hari kwibandwa ku bigo bibika amakuru, cloud computing, ibikorwa remezo by’ikoranabuhanga ndetse n’ubwenge buhangano.
Umubano hagati y’u Rwanda na Oman warushijeho gukomera nyuma y’uko ingendo z’indege zitaziguye zitangiye. Muri Nyakanga 2026, kompanyi y’indege ya SalamAir yatangiye ingendo zihuza Muscat na Kigali inshuro ebyiri mu cyumweru.
Izi ngendo zafunguye inzira y’ubuhuzabikorwa butaziguye hagati y’ibihugu byombi, ndetse zishobora korohereza abashoramari, abacuruzi n’abakerarugendo kugenda hagati y’u Rwanda na Oman ndetse no kugera ku masoko yo mu bihugu by’Abarabu.
U Rwanda na Oman kandi bifite inyungu zo kwagura imikoranire mu zindi nzego zirimo ingufu, ubucukuzi bw’amabuye y’agaciro, ubukerarugendo, ubuvuzi, uburezi n’ikoranabuhanga.
Muri uru ruzinduko, Perezida Kagame ategerejweho gukomeza gushimangira ubu bufatanye, by’umwihariko mu bijyanye n’ubucuruzi n’ishoramari.
Ku ruhande rw’u Rwanda, ubufatanye na Oman bushobora kurufasha kurushaho kugera ku masoko yo mu Kigobe no mu Burasirazuba bwo Hagati. Oman na yo ishobora kungukira ku mwanya w’u Rwanda nk’igihugu gishobora gufasha abashoramari n’abacuruzi kugera ku masoko yo muri Afurika y’Uburasirazuba.
