Mu mpeshyi ya 2025, ubwo Arsenal yatangizaga urugendo rwayo muri UEFA Champions League, ntabwo benshi bari bazi ko iyo kipe yo mu majyaruguru ya Londres yari igiye kwandika imwe mu nkuru zikomeye muri ruhago y’u Burayi muri uyu mwaka w’imikino.
Byatangiye ku wa 16 Nzeri 2025 mu mukino wabereye muri Espagne, aho Arsenal yatsinze Athletic Club ibitego 2-0. Iyo ntsinzi ya mbere yabaye ikimenyetso cy’ikipe yari ifite intego zirenze izo kwitabira irushanwa gusa. Nyuma y’iyo ntsinzi, Olympiacos na yo ntiyabashije guhagarika Arsenal kuko yatsinzwe ibitego 2-0 kuri Emirates Stadium.
Mu mikino yakurikiyeho, ikipe ya Mikel Arteta yakomeje gutanga ubutumwa bukomeye. Yanyagiye Atlético Madrid ibitego 4-0 imbere y’abafana bayo, ibintu byatumye abasesenguzi batangira kuyishyira mu makipe ashobora kugera kure muri iri rushanwa.
Ubwo League Phase yakomezaga, Arsenal yagaragaje ubuhangange bwayo. Yakuye amanota yuzuye kuri Slavia Praha mbere yo kwakira Bayern Munich mu mukino wari utegerejwe cyane. Nubwo Bayern yari ifite amateka akomeye muri Champions League, Arsenal yayitsinze ibitego 3-1, ihita yemeza ko ishobora guhangana n’ibihangange by’i Burayi.
Iyo ntsinzi yakurikiwe n’izindi zatumye Arsenal ikomeza kuganza. Yatsindiye Club Brugge mu Bubiligi, inakura amanota yuzuye kuri Inter Milan i San Siro, imwe muri stade zifite amateka akomeye muri ruhago y’u Burayi. Icyiciro cya mbere yagisoje itsinze Kairat Almaty, bituma irangiza imikino yayo yose nta ntsinzwi.
Mu cyiciro cya 1/8 cy’irangiza, Arsenal yahuye na Bayer Leverkusen. Nyuma yo kunganya 1-1 mu Budage, yifashishije imbaraga z’abafana bayo itsinda 2-0 i Londres, ikomeza ku giteranyo cy’ibitego 3-1.
Muri 1/4, ikipe yo muri Portugal ya Sporting CP na yo ntiyashoboye guhagarika Arsenal. Igitego kimwe cyabonetse mu mukino ubanza cyabaye igihagije kugira ngo Arsenal ikomeze, nyuma y’uko umukino wo kwishyura urangira amakipe yombi anganya ubusa ku busa.
Kugera muri 1/2 cy’irangiza byari intambwe ikomeye kuri Gunners, ariko ikizamini gikomeye cyari kigitegerejwe. Atlético Madrid yari yagarutse mu nzira yayo nyuma yo gusezerera Barcelona. Umukino ubanza wabereye muri Espagne warangiye amakipe yombi anganya igitego 1-1, bituma ibyemezo byose bisigara bizafatirwa i Londres.
Ku wa 5 Gicurasi 2026, Emirates Stadium yabaye nk’ikirunga cy’ibyishimo. Igitego rukumbi cyabonetse muri uwo mukino cyahesheje Arsenal intsinzi ya 1-0 n’itike yo kugera ku mukino wa nyuma ku giteranyo cy’ibitego 2-1.
Iyo ntsinzi yari ifite igisobanuro gikomeye ku bafana ba Arsenal bari bamaze imyaka 20 bategereje kongera kubona ikipe yabo ku rwego rwo hejuru rwa ruhago y’u Burayi. Bwa mbere kuva muri 2006, Arsenal yongeye kwisanga ku mukino wa nyuma wa UEFA Champions League.
Mu rugendo rwayo rwose, Arsenal yagaragaje imbaraga zishingiye ku bufatanye bw’abakinnyi bayo. David Raya yabaye umwe mu banyezamu beza muri iri rushanwa, mu gihe William Saliba na Gabriel Magalhães bayoboye ubwugarizi bwagoye amakipe menshi kubona izamu.
Hagati mu kibuga, Declan Rice yakomeje kwigaragaza nk’umukinnyi w’ingenzi mu guhuza umukino no kurinda ubwugarizi, mu gihe Martin Ødegaard yakomeje kuba umuyobozi wa tekinike n’ubuhanga. Mu busatirizi, Bukayo Saka na Kai Havertz bagize uruhare rukomeye mu bitego no mu guhanga uburyo bwatumye Arsenal ikomeza gutsinda.
Kuri uyu wa 30 Gicurasi 2026, urugendo rwatangiriye muri Espagne rugeze ku rwego rwo hejuru i Budapest muri Hungary, aho Arsenal ihurira na Paris Saint-Germain ku mukino wa nyuma wa UEFA Champions League.
Kuri Gunners, uyu si umukino usanzwe. Ni amahirwe yo kurangiza urugendo rw’amezi umunani mu buryo butazibagirana no kwegukana igikombe cya mbere cya UEFA Champions League mu mateka y’iyi kipe.
Ikindi gituma Arsenal yinjira muri uyu mukino ifite icyizere ni uko yamaze kwegukana igikombe cya Premier League muri uyu mwaka w’imikino. Iyo ntsinzi muri shampiyona y’u Bwongereza yayihaye icyizere, ubunararibonye n’imbaraga zo kwizera ko ishobora no kwigarurira u Burayi.
Kuva ku ntsinzi ya mbere muri Espagne kugeza ku ijoro rikomeye rya Budapest, Arsenal yerekanye ko yagarutse mu rwego rw’amakipe akomeye y’i Burayi kandi ko ifite ubushobozi bwo kwandika amateka mashya mu rugendo rwayo rwa ruhago.
