Mu ijoro ritegerejwe na miliyoni z’abakunzi b’umupira w’amaguru ku Isi, Arsenal FC na Paris Saint-Germain ziracakirana mu mukino wa nyuma wa UEFA Champions League, buri ruhande rufite intego yo kwandika amateka mashya.
Nubwo amakipe yombi afite abakinnyi bashobora guhindura umukino mu kanya gato, isesengura ry’abakinnyi bashobora kubanza mu kibuga rigaragaza ko abafana bashobora kwitega umukino urimo umuvuduko, ubuhanga ndetse n’ubuhanga bwo kugenzura hagati mu kibuga.
Umutoza wa Arsenal Mikel Arteta arifashisha David Raya mu izamu, imbere ye hagakinamo Riccardo Calafiori, Gabriel Magalhães, William Saliba na Cristhian Mosquera.
Muri aba bakinnyi, Saliba na Gabriel ni bo bazaba bafite inshingano zo guhagarika ba rutahizamu ba PSG, cyane cyane Ousmane Dembélé na Khvicha Kvaratskhelia bazwiho umuvuduko n’ubuhanga bwo kunyura ku bakinnyi.
Hagati mu kibuga, Arsenal ifite imwe mu nkingi zikomeye muri uyu mwaka zirimo Declan Rice, Myles Lewis-Skelly na kapiteni Martin Ødegaard.
Rice uretse gutanga uburinzi ni nawe ushobora kuba urufunguzo rw’umukino, aho afite ubushobozi bwo gutangiza ibitero no gutsinda ibitego mu bihe bikomeye. Ødegaard we araba ashinzwe kurema uburyo bw’ibitego no guhuza umukino hagati n’ubusatirizi.
Mu busatirizi, Arsenal ishobora irifashisha Viktor Gyökeres hagati, afashijwe na Bukayo Saka na Leandro Trossard.
Gyökeres arinjira muri uyu mukino afite igitutu ariko anafite icyizere gikomeye nyuma y’umusaruro yagaragaje muri shampiyona. Ni rutahizamu ushobora gukoresha amahirwe make cyane akabyaza umusaruro.
Ku ruhande rwa Saka, benshi bamufata nk’umukinnyi ushobora kuba icyemezo cy’uyu mukino. Ubuhanga bwe mu gutera imipira y’imiterekano, kunyura ku bakinnyi no gutanga imipira ivamo ibitego bishobora guteza ibibazo bikomeye ba myugariro ba PSG.
PSG ishobora kubanza mu kibuga ifite Matvey Safonov mu izamu, imbere ye hari Achraf Hakimi, Marquinhos, Willian Pacho na Nuno Mendes.
Aba bose bafite inshingano zo guhangana n’umuriro wa Arsenal, ariko cyane cyane Hakimi na Mendes bazasabwa guhagarika Saka na Trossard ku mpande.
Hagati mu kibuga, PSG ifite uruhande rukomeye rugizwe na João Neves, Vitinha na Fabián Ruiz. Muri aba, Vitinha ni we ugaragara nk’umukinnyi ushobora kugenzura umuvuduko w’umukino. Ubushobozi bwe bwo kugumana umupira no gutanga imipira ifungura ubwugarizi bushobora kuba intwaro ikomeye ku ikipe yo mu Bufaransa.
Mu busatirizi, PSG irashingira cyane kuri Ousmane Dembélé, Khvicha Kvaratskhelia na Désiré Doué.
Dembélé amaze igihe agaragaza urwego rwo hejuru cyane, aho ashobora guhindura umukino mu kanya gato. Kvaratskhelia na we ni umwe mu bakinnyi bafite ubushobozi bwo gutsinda cyangwa gutanga umupira uvamo igitego igihe cyose abonye umwanya.
Ku ruhande rwa Doué, nubwo akiri muto, amaze kwigaragaza nk’umwe mu bakinnyi bafite impano idasanzwe ndetse ashobora gutungura benshi kuri uyu mukino.
Abasesenguzi benshi bemeza ko intsinzi ishobora kuzaturuka ku ikipe izatsinda urugamba rwo hagati mu kibuga.
Arsenal yo irashingira kuri Rice na Ødegaard mu kugenzura umukino, mu gihe PSG izaba yiringiye Vitinha na João Neves kugira ngo ifate umupira kandi yubake ibitero.
Uyu mukino utegerejweho guhangana gukomeye hagati y’ikipe ya Arsenal ishaka gutwara UEFA Champions League bwa mbere mu mateka yayo n’ikipe ya PSG na yo ikomeje guhiga iki gikombe kimaze imyaka kiyisiga.
Gukina ku rwego rwiza kwa Saka, Gyökeres na Ødegaard biha Arsenal amahirwe menshi yo gutsinda. Ariko kandi PSG ifite Dembélé, Kvaratskhelia na Vitinha bashobora guhindura ibintu mu kanya gato.
Icyizere kiri ku mpande zombi, ariko umukino ushobora gutandukanywa n’ikosa rimwe, impano y’umukinnyi umwe cyangwa icyemezo cy’umutoza mu minota ya nyuma.
Ku mpapuro, birasa nk’umukino uraba wihuta cyane, ariko uko amakipe yombi afite impano n’inyota y’igikombe, abafana bashobora kwitega imwe muri final zishobora gusigara mu mateka ya UEFA Champions League.
