I & M Bank Rwanda Yashyizeho Gahunda “Berwa” yo Gufasha Abagore mu Bucuruzi

Berwa ni gahunda ikubiyemo ibice bibiri by’ingenzi birimo igice cyo guha abagore inguzanyo y’imyaka itanu y’agera kuri miliyoni 400 Frw, itagira ingwate ndetse iri ku nyungu ya 8% ku mwaka.

Akarusho k’iyi gahunda kandi ni uko I&M Bank Rwanda PLC izakurikiranira hafi ibikorwa byahawe inguzanyo ku buryo igihe ubucuruzi bwaba butari kugenda neza umuntu ashobora gusaba kuba ahagaritse kwishyura inguzanyo by’igihe gito akazasubukura ubucuruzi bwasubiye ku murongo.

Igice cya kabiri ni ikijyanye n’ubujyanama ndetse n’amahugurwa ku bijyanye n’ubucuruzi ndetse n’imari aho umugore ukeneye gutangira ubucuruzi cyangwa ukeneye kubwagura azajya ahabwa ubujyanama ndetse n’amasomo yabyo.

Muri iki gice kandi I&M Bank Rwanda Plc yashyizeho icyiswe ‘Women Cafe’, aho abagore bamaze gutera imbere mu bucuruzi bazajya bahuzwa n’abagore bagitangira ubucuruzi buri gihembwe kugira ngo baganire, bungurane ibitekerezo ndetse abateye imbere bagire inama abakiri bato mu bucuruzi.

Umuyobozi Mukuru wa I&M Bank Rwanda PLC, Benjamin Mutimura, yavuze ko iyi gahunda yagiyeho nyuma yo kubona ko abagore benshi bafite inyota yo gutera imbere ariko bakigorwa no kubona igishoro n’ingwate ku bakeneye inguzanyo n’ubumenyi budahagije mu bijyanye no gucunga ubucuruzi n’ibindi.

Ati: “Nka banki twatekereje ku buryo twakemura ibyo ibbazo ni bwo twatekereje iyi gahunda kugira ngo tubone abagore benshi mu bucuruzi. Kandi ibi si gisubizo gusa ahubwo ni isezerano duhaye abagore ko tuzafatanya na bo mu rugendo rwabo rwose rw’iterambere.”

Guverineri Wungirije wa Banki Nkuru y’u Rwanda, Nick Barigye, yagaragaje ko 92% by’Abanyarwanda bashobora kubona serivisi za banki ariko 5,8% by’ubucuruzi bw’abagore ari bwo bushobora kubona inguzanyo.

Ati “Ni ikintu gihangayishije kuba twarakoze ibishoboka ngo Abanyarwanda 92% bagerweho na serivisi za banki ariko byagera ku bucuruzi bw’abagore 5,8% akaba aribo bonyine bashobora kubona inguzanyo. Bivuze ko iyo umugore akeneye igishoro areba inshuti n’imiryango ndetse n’ubwizigame bwe ariko adashobora kujya muri banki.”

Yakomeje avuga ko banki zikwiye guhagurukira gukemura iki kibazo zizana gahunda nk’iyi ya I&M Bank Rwanda PLC, zigamije korohereza bagore kubona serivisi za banki.

Muri iki gikorwa abagore batandukanye bahawe amahirwe yo kumurika ibikorwa byabo ndetse abandi nka Sonia Iraguha washinze restaurant ya Bicu Lounge basangije abitabiriye iki gikorwa urugendo rwabo.