Akarere ka Musanze kari mu myiteguro yo kwakira umuhango uzwi ku izina rya Kwita Izina, uteganyijwe ku wa Gatanu tariki ya 4 Nzeri 2026. Uyu muhango ukazabera mu Kinigi, hafi ya Pariki y’Ibirunga, aho usanzwe uhuriza hamwe imbaga y’abantu batandukanye.
Nk’uko byatangajwe n’Urwego rw’Igihugu rushinzwe Iterambere (RDB), rutegura iki gikorwa, biteganyijwe ko uzitabirwa n’abaturage, abayobozi, abafatanyabikorwa mpuzamahanga n’abarengera ibidukikije, nk’uko bisanzwe bikorwa buri mwaka.
Kwita Izina ni igikorwa kiba buri mwaka kigamije kwizihiza ivuka ry’ingagi nshya zo mu misozi, kikaba n’umwanya wo kugaragaza uruhare rw’u Rwanda mu kubungabunga urusobe rw’ibinyabuzima. Gishingiye ku muco nyarwanda wo kwita amazina abana bavuka, iki gikorwa cyashyizweho mu buryo bwa kinyamwuga muri 2005, hagamijwe gushimangira ibikorwa byo kurengera ingagi no gushishikariza abaturage kubigiramo uruhare.
Kuva cyatangira, ingagi zirenga 400 zimaze kwitwa amazina, bigaragaza intambwe igihugu kimaze gutera mu kubungabunga ubu bwoko bw’inyamaswa bwihariye.
Muri iri rushanwa rigiye kuba ku nshuro ya 21, RDB yagaragaje ko hibandwa ku nshingano za buri wese mu kurengera ingagi n’aho ziba, by’umwihariko abaturage batuye hafi ya pariki.
Uyu muhango umaze kuba kimwe mu bikorwa bikomeye muri Afurika bijyanye no kurengera ibidukikije, aho ukurura abashyitsi batandukanye barimo abashakashatsi, ba mukerarugendo n’abandi bafite uruhare mu kubungabunga ibidukikije baturutse hirya no hino ku Isi.
Icyakora, umubare w’ingagi zizahabwa amazina muri uyu mwaka ndetse n’abazazita amazina ntibiratangazwa.
Kwita Izina kandi bifatwa nk’inkingi ikomeye mu guteza imbere ubukerarugendo bw’u Rwanda, cyane cyane ubushingiye ku gusura ingagi zo mu misozi, bukomeje gukurura ba mukerarugendo benshi.
Imibare igaragaza ko muri 2025, ubukerarugendo bwinjije miliyoni 685 z’amadolari y’Amerika, buvuye kuri miliyoni 647 muri 2024, bingana n’izamuka rya 6%. Umubare w’abasuye igihugu nawo wiyongereyeho 9%, ugera kuri miliyoni 1.49.
Pariki y’Ibirunga ikomeje kuba imwe mu hantu hasurwa cyane, by’umwihariko ku bashaka kureba ingagi, igikorwa gikorerwa ku mategeko akomeye kandi gisaba uruhushya rutangwa ku giciro gitandukanye bitewe n’uwagisabye.
Mu myaka ishize, Kwita Izina yarenze kuba umuhango usanzwe, ihinduka ikimenyetso cy’ubwitange bw’u Rwanda mu kubungabunga ibidukikije mu buryo burambye kandi bufite aho buhuriye n’abaturage.
Iyi gahunda ihuza umuco n’ibikorwa by’iterambere birengera ibidukikije, igatuma u Rwanda rukomeza kwigaragaza ku rwego mpuzamahanga nk’igihugu kiyoboye mu bukerarugendo burambye no kurengera inyamaswa.
Ku nshuro ya 21, Kwita Izina biteganyijwe muri Nzeri 2026, aho bitegerejweho kongera kuba igikorwa gikomeye gihuza umuco, ibidukikije n’iterambere ry’ubukungu bw’igihugu.
Umuhango wo Kwita Izina Ingagi ku nshuro ya 21 uzaba tariki 4 Nzeri 2026
