Abantu bane bamaze gupfa nyuma y’isenyuka ry’inyubako yari ikiri kubakwa mu gihugu cya Philippines, mu gihe ibikorwa byo gushakisha no gutabara abakiri munsi y’amatongo bikomeje.
Iyo nyubako y’amagorofa icyenda yaguye ku Cyumweru mu mujyi wa Angeles, uherereye mu majyaruguru y’umurwa mukuru Manila. Abayobozi bavuga ko nibura abantu 17 aribo baburiwe irengero.
Ku wa Mbere, abatabazi bakuye abantu batatu munsi y’ibisigazwa by’iyo nyubako. Bamwe muri bo bari bagifite ibimenyetso by’ubuzima mbere y’uko bapfira kwa muganga.
Maria Leah Sajili, ushinzwe itumanaho mu rwego rushinzwe kuzimya inkongi no gutabara muri Philippines, yavuze ko umwe mu bakuwemo yari agifite umutima utera ariko aza gupfa nyuma, mu gihe undi yagize ikibazo gikomeye cy’umutima akiri munsi y’amatongo.
Abatabazi banabonye umurambo w’undi muntu, gusa kugeza ubu ntiharamenyekana niba ari umwe mu bari ku rutonde rw’abashakishwa.
Abenshi mu baburiwe irengero ni abakozi bubakaga iyo nyubako, bari baharyamye ubwo yagwaga mu ijoro ryo ku Cyumweru.
Mu bapfuye harimo kandi umukerarugendo ukomoka muri Malaysia wari ucumbitse mu nzu yacumbikiragamo abantu hafi y’aho inyubako yaguye. Ibisigazwa by’inyubako byangije igice cy’iyo nzu, mu gihe undi muntu wari uyicumbitsemo yakomeretse ariko akabasha guhunga.
Kugeza ubu abantu 26 bamaze kurokorwa. Umunyamakuru wa Al Jazeera uri i Angeles, Barnaby Lo, yavuze ko icyizere cyo kubona abandi bakiri bazima kigenda kigabanuka, nubwo ibikorwa byo gushakisha bigikomeje hifashishijwe ibikoresho bipima ubushyuhe n’imikorere y’umutima.
Yagize ati: “Abayobozi baracyavuga ko ibikorwa biri gukorwa ari ibyo gushakisha no gutabara. Bari gukoresha ibikoresho bipima ubushyuhe kugira ngo barebe niba hari abandi bagaragaza ibimenyetso by’ubuzima, ariko nibatababona bavuga ko bazatangira gukoresha imashini ziremereye mu gukuraho ibisigazwa by’inyubako no gukuramo abantu bakeka ko bagifatiwe munsi y’amatongo.”
Abayobozi bavuga ko ahubakwaga iyo nyubako hasanzwe hakorera abantu bagera kuri 70, gusa benshi muri bo bari bagiye mu rugo kubera impera z’icyumweru.
Umwe mu bakozi warokotse, Alfredo Albis w’imyaka 55, yavuze ko yari aryamye mu cyumba cy’abakozi kiri hafi ya metero eshanu uvuye kuri iyo nyubako ubwo yagwaga.
Ati: “Mfite babyara banjye babiri bakiri munsi y’amatongo. Bari bari gukorera hano bashaka imibereho y’imiryango yabo kandi kugeza ubu ntibaraboneka.”
Kugeza ubu icyateye iryo senyuka ntikiramenyekana. Umuyobozi w’umujyi wa Angeles, Carmelo Lazatin, yavuze ko ubuyobozi buri gushakisha nyiri iyo nyubako kugira ngo hatangwe ibisobanuro ku byabaye ndetse hanamenyekane umubare nyakuri w’abakozi bari bahari.
Imiryango y’ababuriwe ababo ikomeje kugaragaza agahinda n’impungenge kubera uburyo ibikorwa byo gushakisha biri kugenda buhoro.
