Umushinjacyaha Mukuru w’Urukiko Mpuzamahanga Mpanabyaha (ICC), Karim Khan, yahagaritswe by’agateganyo ku mirimo ye mu gihe hakomeje gusuzumwa ibirego bikomeye bimushinja ihohotera rishingiye ku gitsina.
Iki cyemezo cyafashwe nyuma y’uko Komite Nshingwabikorwa y’uru rukiko isuzumye ibyavuye mu iperereza ry’ibanze kuri ibi birego. Dosiye ya Khan yamaze koherezwa mu nama idasanzwe y’ibihugu 125 binyamuryango bya ICC, ari na byo bizafata umwanzuro ku hazaza he muri uru rwego mpuzamahanga rushinzwe gukurikirana ibyaha bikomeye.
Amakuru yatangajwe na ICC agaragaza ko Komite igizwe n’ibihugu 21 yasanze hari impamvu zikomeye zituma imyitwarire ya Khan ikomeza gusuzumwa, nyuma y’ibirego byatanzwe n’umugore bakoranaga ku cyicaro gikuru cy’uru rukiko kiri i La Haye mu Buholandi.
Uyu mugore yavuze ko ibikorwa ashinja Khan byabaye hagati y’umwaka wa 2023 na 2024. Ibyo birego byatumye abayobozi b’uru rukiko batangira inzira yo gusuzuma niba yakomeza inshingano ze cyangwa niba yakurwaho burundu.
Nubwo bimeze bityo, Karim Khan yakomeje kwamagana ibyo ashinjwa. Itsinda rimwunganira mu mategeko ryatangaje ko ahakana ibyo birego mu buryo budasubirwaho kandi ko nta na rimwe yigeze akoresha nabi ububasha bwe cyangwa ngo ahutaze uwo ari we wese.
ICC yasobanuye ko icyemezo cyo guhagarika Khan ku mirimo kitagomba gufatwa nk’icyemezo cya nyuma ku birego aregwa. Ahubwo cyafashwe mu rwego rwo gutuma iperereza rikomeza mu mucyo no kurinda ubwigenge bw’inzego ziri gukora isuzuma ry’iki kibazo.
Mu gihe ibihugu binyamuryango bikomeje kwiga kuri iyi dosiye, hazategerezwa umwanzuro uzagena niba Karim Khan azasubira ku mirimo ye cyangwa niba azahura n’ibihano bishobora kugera no ku kumukura burundu ku mwanya w’Umushinjacyaha Mukuru wa ICC.
Iki kibazo gikomeje gukurikiranwa n’amahanga kuko Karim Khan ari umwe mu banyamategeko bazwi cyane ku rwego mpuzamahanga, by’umwihariko kubera uruhare yagize mu manza zikomeye zagiye zikurikiranwa n’Urukiko Mpuzamahanga Mpanabyaha mu myaka yashize.
