Nibagwire yazamuwe no guhinga indabo

Mu Rwanda guhinga indabo bikorwa n’abantu bake kandi zikenerwa cyane ari yo mpamvu rwiyemezamirimo Nibagwire Donathile, yarebye kure ahitamo kuzihinga by’umwuga kandi bimutungiye umuryango ndetse yageze kuri byinshi.

Uwu mugore umaze imyaka 13 ahinga indabo n’ibindi biti by’imbuto ziribwa n’iby’imitako, avuga ko igitekerezo cyo gukora uwu mushinga yagikuye mu ngendoshuri yakoreye muri Kenya, abihuza n’uko mu Rwanda indabo zahingwaga n’abantu bake kandi mu buryo buciriritse.

Kuri ubu ahinga umushinga we awukorera mu gishanga cya Nyacyonga ku buso bwa hegitari imwe ariko akaba agiye kwagura ibikorwa kuko yishyize hamwe n’abagore b’inzobere mu buhinzi bw’indabo, umwe wo muri Kenya n’undi w’umurundikazi.

Aba bagore bakaba baherutse gufungura ihuriro bise African Wemen Agribusiness Network (AWAN), ikaba ifite ibikorwa byo guhinga indabo mu bice bitandukanye by’u Rwanda ndetse n’i Burundi.

Avuga ku byo bagezeho, Nibagwire yagize ati “Umujyi wa Kigali ku bufatanye n’Akarere ka Gasabo baduhaye igishanga kigari ahitwa i Kinyinya, kandi twiteze umusaruro ushimishije”.

Akomeza avuga ko impamvu bahisemo gushyira igice kinini cy’umushinga wabo mu Rwanda ari uko hari umutekano ndetse na Leta ikaba yorohereza abahinzi cyane cyane abagore ba rwiyemezamirimo. Gutwara umusaruro ujya hanze y’igihugu na byo biroroha kuko hari indege za Rwanda Air zijya mu bihugu byinshi.

By’umwihariko, Murebwayire avuga ko yageze kuri byinshi kuva yatangira guhinga indabo kuko ubu yumva nta kandi kazi yakora.

Ati “Nabashije kwiyubakira inzu y’insirimu, abana banjye biga mu mashuri meza kandi nta kibazo ngira cyo kubishyurira, mbese ndi umugore utunze urugo rwe kandi n’icyerekezo mfite mbona ari cyiza kuko ndimo kwagura isoko mu bihugu bitandukanye”.

Agira inama abagore hagenzi be yo gukunda umurimo w’ubuhinzi kuko ukiza nyirawo cyane iyo awukoranye ubuhanga kuko muri iki gihe ubuhinzi bwitaweho.

Mutesi Scovia

Nibagwire uwambaye umutuku, ari kumwe n’umwe mu bo bakorana.