Mu gihe ubukungu bw’Isi bukomeje guhura n’ihungabana rishingiye ku bibazo by’umutekano muke mu bice bitandukanye, Guverinoma y’u Rwanda yasabye abaturage kugira uruhare rufatika mu kugabanya ingaruka bishobora kugira ku mibereho yabo.
Ibi byagarutsweho mu Nama y’Abaminisitiri yabereye muri Village Urugwiro ku wa 2 Mata 2026, iyobowe na Perezida wa Repubulika, Paul Kagame. Muri iyi nama, hagaragajwe ko amakimbirane akomeje mu Burasirazuba bwo Hagati ashobora kugira ingaruka ku biciro by’ingufu, cyane cyane ibikomoka kuri peteroli.
Abagize Guverinoma bagaragaje ko ikibazo cy’ikorwa cyangwa ifungwa ry’umuyoboro wa Strait of Hormuz, unyuramo igice kinini cy’ibikomoka kuri peteroli byoherezwa ku Isi, gishobora gutuma ibiciro by’ubwikorezi n’ibikomoka ku ngufu bizamuka mu bihugu byinshi, harimo n’u Rwanda.
Nubwo hari izi mpungenge, Guverinoma y’u Rwanda yemeje ko izakomeza gushyiraho ingamba zo kurinda abaturage, zirimo kugenzura isoko ry’ibikomoka kuri peteroli no gushaka ubundi buryo bwo gukoresha neza ingufu hagamijwe kugabanya ingaruka z’izamuka ry’ibiciro.
Ubuyobozi bw’igihugu bwagaragaje kandi ko gutanga amakuru ku gihe ari ingenzi, kuko bifasha abaturage gusobanukirwa n’imihindagurikire y’ubukungu no gufata ibyemezo bibafasha guhangana n’ibihe bitoroshye.
Mu karere u Rwanda ruherereyemo, ibiciro by’ibikomoka kuri peteroli bikomeje kuzamuka. Urugero n’urwo muri Tanzania, aho muri iki cyumweru litiro imwe yageze hafi ku mafaranga 1500 y’u Rwanda, ikiyongeraho amafaranga arenga 500 ugereranyije n’ayari asanzwe.
No mu Rwanda kandi, mu ntangiriro z’ukwezi kwa Werurwe 2026, ibiciro bya peteroli byarenze amafaranga 1900 kuri litiro, ibintu byatumye abaturage bagira impungenge ko bishobora gukomeza kuzamuka bitewe n’uko isoko mpuzamahanga rihagaze.
Abasesenguzi mu bukungu bagaragaza ko uburyo bwiza bwo kugabanya izi ngaruka ari ugutanga amakuru ku gihe no gushishikariza abaturage gukoresha neza ingufu, kuko bifasha ibihugu kugabanya ingaruka z’ihindagurika ry’ubukungu ku rwego mpuzamahanga.
Ibiciro by’ibikomoka kuri peteroli bikomeje gutumbagira
