Umuryango utari uwa Leta uharanira iyubahirizwa ry’amategeko n’uburenganzira bwa muntu CERULAR iravuga ko hakwiye gutekerezwa ikindi cyo kugenderwaho mu gihe ukekwaho icyaha utishoboye agiye guhabwa umwunganizi hatagendewe ku cyiciro cy’ubudehe gusa.
Ku wa 29 Ukuboza 2022, CERULAR n’indi miryango bafatanya mu gukora ubuvugizi mu by’amategeko bagaragazaga ubushakashatsi bakoze, harebwa uko abantu babona ubufasha mu by’amategeko.
Aha bagaraje ko hakiri imbogamizi ku banyarwanda mu kugezwaho ubufasha mu by’amategeko, nko kuba igiciro cy’umwavoka kiri hejuru ndetse n’ibigendrwaho mu gihe Leta igiye gushakira umuturage umwunganizi.
John Mudakikwa, Umuyobozi Nshingwabikorwa wa CERULAR agira ati “Ibyiciro by’ubudehe nicyo kintu nyamukuru kigenderwaho iyo umuntu agiye gushakirwa umwunganira mu mategeko, ndetse n’igiciro cyo kwishyura umwunganizi mu mategeko kiri kiri hejuru. Birakenewe ko hagira ikindi kizajya kireberwaho hatagendewe ku byiciro by’ubudehe, gusa kuko iperereza riba umuntu afunze, urebye neza umutu ufunze hari igihe nta bushobozi aba agifite.”
Ku bijyanye n’uburyo abanyarwanda bagerwaho n’ubufasha mu by’amategeko, iyi miryango yagaragaje ko hakiri ikibazo ku bajyanama mu by’amategeko bazwi nka MAJ bakorera ku rwego rw’akarere, ugasanga umuturage atoroherwa no kubabona; bityo bagasaba ko MAJ yagira ibiro kugeza nibura ku rwego rw’umurenge.
Umuyobozi Mukuru w’urwego rw’ubutabera muri Minisiteri y’ubutabera, Bwana Anastase Nabahire, avuga ko hari ibiri gukorwa ngo izi mbogamizi zigabanuke kandi ko ubushake buhari bwo kubikemura.
Agira ati “ku giciro cy’umu Avoka nawe umubajije yavuga ko ibihumbi Magana atanu ari make ndetse ntitwabona abanyamategeko bangana n’abaturage bose. Gusa ubushake burahari, kugeza ba MAJ ku rwego rw’umurenge. Ubu harebwa uburyo batatu bari mu Karere bajya bagabana imirenge bigendanye n’umubare w’iri mu Karere, wenda umwe akaba afite imirenge ine cyangwa itatu, bityo bikaborohera kwegera abaturage.”
Bwana Anastase Nabahire yongera ho ko ari urugendo kuko bisaba ingengo y’imari ndetse no guhemba abakozi mu gihe bongewemo.
Itegeko ritegenya ko mu gihe ukekwaho icyaha nta bushobozi afite bwo kwishakira no kwishyura umwunganira mu mategeko, Leta ifite inshingano zo kumushakira umwunganira, kuko kuburana umuntu yunganiwe ari uburenganzira bw’uregwa.
Nshungu Raoul
