Kwizera Jackson
New Delhi, Tariki ya 10 Mata— Umuyobozi w’ikirenga wa Iran, Mojtaba Khamenei, afite igenzura ry’ibibera mu gihugu kandi ni we wafashe icyemezo ku giti cye cyo gutangaza agahenge k’intambara Iran ihanganyemo na Leta Zunze Ubumwe za Amerika na Israel.
Ibi byatangajwe n’intumwa ye mu Buhinde, Abdul Majid Hakeem Ilahi, mu kiganiro yagiranye na TASS.
Abdul Majid Hakeem Ilahi yavuze ko Khamenei ari we uyoboye byimazeyo uko ibintu bihagaze muri Iran, kandi ko ari we wagize uruhare rutaziguye mu gufata icyemezo cyo guhagarika imirwano by’agateganyo.
Aya makuru aje mu gihe Iran iri mu ntambara n’Amerika na Israel, aho impande zombi zemeye agahenge k’igihe gito, hagamijwe kugabanya ubukana bw’imirwano no gutanga umwanya ku biganiro bya dipolomasi.
Abasesenguzi mu bya politiki mpuzamahanga bagaragaza ko iki cyemezo gishobora kuba cyaratewe n’impamvu nyinshi zirimo: Igitutu cya dipolomasi cyari cyiyongereye ku ruhande rwa Iran, Impungenge z’uko intambara ishobora gukwira mu karere kose, n’Ingaruka zikomeye ku bukungu no ku mutekano w’imbere mu gihugu
Hari kandi abavuga ko kwemera agahenge bishobora kuba ari uburyo bwo gushaka umwanya wo kongera kwisuganya ku ruhande rwa gisirikare.
Nubwo aka gahenge kagaragaza icyizere, amateka agaragaza ko amasezerano nk’aya akenshi aba ay’igihe gito. Impande zirebwa n’iki kibazo ziracyafite ibyo zitumvikanaho bikomeye, bishobora gutuma imirwano yongera kubura igihe icyo ari cyo cyose.
Umusesenguzi umwe yagize ati: “Agahenge ni intambwe nziza, ariko si igisubizo kirambye. Ikizagaragaza intsinzi ni ibiganiro bizakurikiraho.”
Iki cyemezo gishobora kugira ingaruka nini ku mutekano wo mu karere ndetse no ku mibanire mpuzamahanga. Ibihugu byinshi bikomeje gukurikirana hafi ibiri kuba, bisaba ko aka gahenge kubahirizwa no kubyazwa umusaruro mu biganiro by’amahoro.
