Muri uku kwezi kwa Werurwe, isi yose iri kwibanda ku bukangurambaga bwo kumenyekanisha no kwirinda indwara ya Colorectal Cancer, imwe mu ndwara za kanseri zica abantu benshi buri mwaka ku Isi.
Nk’uko bitangazwa n’Umuryango Mpuzamahanga ushinzwe kwita ku buzima World Health Organization (OMS), uku kwezi kugenewe kongera ubumenyi ku ndwara ya kanseri ifata amara manini n’igice cyayo cya nyuma kizwi nka rectum.
Iyi ndwara ikunze gutangira ari utubyimba duto twitwa polyps tumerera mu ruhu rw’imbere rw’amara manini cyangwa rectum, hanyuma uko igihe kigenda gishira tumwe muri two tukaba twahinduka kanseri.
Mu ntangiriro z’iyi ndwara, akenshi nta bimenyetso bigaragara umuntu ashobora guhita abona. Iyi ni yo mpamvu abaganga bashishikariza abantu kwisuzumisha kare kugira ngo indwara ibonwe hakiri igihe.
Bimwe mu bimenyetso bishobora kugaragaza ko umuntu ashobora kuba arwaye iyi kanseri harimo guhinduka kw’imikorere y’amara nko kuribwa mu nda cyangwa gucibwamo, kubona amaraso mu musarane, kubabara mu nda, kugabanuka ibiro mu buryo budasobanutse ndetse no kugira umunaniro uhoraho.
Hari kandi ibintu bishobora kongera ibyago byo kuyirwara. Muri byo harimo gusaza, kurya indyo ituzuye cyangwa irimo ibinure byinshi, kudakora imyitozo ngororamubiri, umubyibuho ukabije, kunywa itabi no kunywa inzoga nyinshi.
Umuryango OMS ugaragaza ko igice kinini cy’iyi ndwara gishobora kwirindwa umuntu ahinduye imibereho ye. Mu by’ingenzi ashobora gukora ngo ayirinde harimo kurya indyo yuzuye irimo imbuto n’imboga nyinshi, gukora imyitozo ngororamubiri buri gihe no kwirinda itabi.
Abahanga mu buzima kandi bagaragaza ko kwisuzumisha kare ari ingenzi cyane, kuko iyo iyi kanseri ibonetse hakiri kare bishobora gutuma ivurwa neza kandi amahirwe yo gukira akiyongera cyane.
