Leta y’u Bufaransa yatangaje ko yabonye umurwayi wa mbere wanduye Ebola ku butaka bwayo kuva iki cyorezo cyakwaduka muri Repubulika Iharanira Demokarasi ya Congo (RDC), aho uwo murwayi ari umuganga wari uvuye mu butumwa bw’ubuvuzi muri icyo gihugu cyo muri Afurika yo Hagati.
Minisiteri y’Ubuzima y’u Bufaransa yavuze ko uwo muganga yahise ashyirwa mu kato ageze mu gihugu kandi akajyanwa mu kigo cyihariye cyita ku ndwara zandura. Yatangaje kandi ko ubuzima bwe buhagaze neza ndetse ko hafashwe ingamba zose zo gukumira ikwirakwira ry’iyo ndwara.
Abashinzwe ubuzima muri icyo gihugu batangaje ko hatangiye igikorwa cyo gushakisha no gukurikirana abantu bose bashobora kuba barahuye n’uwo murwayi, kugira ngo bakurikiranwe mu gihe cy’iminsi 21 nk’uko biteganywa mu ngamba zo kurwanya Ebola.
Iyi ni yo nshuro ya mbere Ebola yemejwe ku butaka bw’u Bufaransa kuva iki cyorezo cyagera muri RDC muri Gicurasi 2026. Abayobozi b’icyo gihugu bavuga ko ibyago byo gukwirakwira kwayo mu baturage bisanzwe bikiri hasi cyane kubera uburyo bwo gukurikirana abagenzi n’ingamba z’ubwirinzi zimaze igihe zishyizweho.
Icyorezo cya Ebola gikomeje guteza impungenge muri RDC no mu bihugu bihana imbibi na yo. Ishami ry’Umuryango w’Abibumbye ryita ku Buzima (OMS) ryatangaje ko icyorezo cy’uyu mwaka cyatewe n’ubwoko bwa virusi ya Bundibugyo, butarabonera urukingo rwemewe cyangwa umuti wihariye.
Imibare iheruka yatangajwe n’inzego z’ubuzima igaragaza ko muri RDC hamaze kwemezwa abarwayi barenga 1.000 ndetse n’impfu zisaga 260 zituruka kuri iki cyorezo, mu gihe Uganda na yo yamaze kubona abanduye.
Abasesenguzi mu by’ubuzima bavuga ko kuba Ebola igeze mu Burayi bitavuze ko hari icyorezo gikomeye gihari, ariko bishimangira akamaro ko gukaza igenzura ku bagenzi bava mu duce twibasiwe n’iyi ndwara no gukomeza ubufatanye mpuzamahanga mu kuyihashya.
Mu gihugu cy’u Bufaransa hagaragaye umurwayi wa mbere wa Ebola wari umuganga
