Nyuma y’imikino ya 1/4, hamenyekanye amakipe ane akomeje muri 1/2 ari yo Argentina, u Bwongereza, u Bufaransa na Espagne, ategerejweho guhatanira itike y’umukino wa nyuma.
Irushanwa ry’Igikombe cy’Isi cya 2026 rigeze mu cyiciro cyaryo cya nyuma, aho amakipe ane gusa ari yo asigaye ahatanira igikombe nyuma y’uko hasojwe imikino ya 1/4 cy’irangiza. Argentina n’u Bwongereza ni yo yabonye amatike ya nyuma yo gukomeza, zisanga u Bufaransa na Espagne zari zamaze kugera muri iki cyiciro.
Argentina yakatishije itike ya 1/2 nyuma yo gutsinda u Busuwisi ibitego 3-1 mu mukino warangiye nyuma y’iminota y’inyongera. Alexis Mac Allister yafunguye amazamu, Dan Ndoye aza kuyishyurira u Busuwisi mbere y’uko Breel Embolo ahabwa ikarita itukura yahinduye isura y’umukino. Mu nyongera, Julián Álvarez na Lautaro Martínez batsinze ibitego byahesheje Argentina intsinzi n’itike ya 1/2.
Ku rundi ruhande, u Bwongereza bwabonye umwanya muri kimwe cya kabiri cy’irangiza nyuma yo gusezerera Norway ibitego 2-1. Norway yari yabanje gufungura amazamu ku gitego cya Andreas Schjelderup, ariko Jude Bellingham yishyura mbere y’ikiruhuko, aza no gutsinda igitego cy’intsinzi mu nyongera, yohereza Three Lions muri 1/2.
Imikino ya kimwe cya kabiri cy’irangiza itegerejwe n’abakunzi b’umupira w’amaguru ku Isi yose. Ku wa Kabiri, tariki ya 14 Nyakanga 2026, u Bufaransa buzacakirana na Espagne mu mukino uzahuza amakipe yombi amaze kwitwara neza kuva iri rushanwa ryatangira.
Bukeye bwaho, ku wa Gatatu tariki ya 15 Nyakanga 2026, Argentina izisobanura n’u Bwongereza mu mukino utegerejwe cyane kubera amateka akomeye aya makipe yombi afitanye ndetse n’urwego rw’abakinnyi bayoboye impande zombi.
Abasesenguzi b’umupira w’amaguru bavuga ko iyi mikino ya 1/2 ishobora kuba ari yo ikomeye kurusha indi yose yabanje, kuko buri kipe isigaye ifite ubushobozi bwo kwegukana igikombe. Argentina irashaka gukomeza urugendo rwo kurinda igikombe yegukanye mu 2022, mu gihe u Bwongereza bushaka kongera kugera ku mukino wa nyuma nyuma y’imyaka myinshi bubiharanira.
Ku rundi ruhande, u Bufaransa burifuza kongera kwandika amateka yo kwegukana Igikombe cy’Isi, naho Spain ishaka gusubira ku rwego rwo hejuru rw’umupira w’amaguru ku Isi. Ibyo bituma imikino ibiri ya 1/2 itegerejweho guha abakunzi b’uyu mukino ishiraniro rikomeye no kugaragaza amakipe azahatanira igikombe cya mbere ku Isi.
Harabura intambwe imwe ngo hamenyekane abazakina umukino wa nyuma, Argentina izahura n’u Bwongereza, u Bufaransa na Espagne muri 1/2
