Inteko Ishinga Amategeko y’u Bufaransa yatoye ku bwiganze busesuye itegeko rikuraho burundu Code Noir, itegeko ryashyizweho mu gihe cy’ubukoloni ryagenzuraga ubucakara mu bihugu u Bufaransa bwakolonizaga.
Abadepite bose 254 bitabiriye itora baryemeje nta n’umwe urirwanyije. Iri tegeko ryari ryarashyizweho mu mwaka wa 1685 ku ngoma y’Umwami Louis XIV.
Nubwo u Bufaransa bwakuyeho ubucakara mu mwaka wa 1848, iri tegeko ntiryigeze rikurwaho ku mugaragaro, ibintu byakomeje kunengwa n’abavuga ko igihugu kitigeze gihangana byuzuye n’amateka yacyo y’ubukoloni n’ubucakara.
Code Noir yafataga abantu b’Abirabura nk’umutungo ushobora kugurishwa cyangwa gukoreshwa uko nyirawo ashaka. Ryemereraga ba shebuja gukoresha ingufu, guhana bikomeye ndetse no gufata imbata nk’ibintu bidafite uburenganzira.
Perezida Emmanuel Macron yavuze ko iri tegeko ritari rikwiye gukomeza kubaho nyuma y’ibikorwa byo gukuraho ubucakara mu kinyejana cya 19, ariko ntiyasabye imbabazi ku mugaragaro nk’uko bamwe babisabaga.
U Bufaransa bwabaye kimwe mu bihugu byagize uruhare runini mu bucuruzi bw’abacakara, aho bwajyanye Abanyafurika barenga miliyoni 1.4 mu mirima yo mu birwa n’utundi duce twakoronizwaga.
Nubwo ibice nka Guadeloupe, Martinique, French Guiana na Réunion byaje kugirwa intara z’u Bufaransa mu 1946, abaturage baho benshi bakomoka ku bakomoka ku bacakara bakomeje kubaho mu bukene no mu bushomeri buri hejuru ugereranyije n’ubutaka bw’u Bufaransa bwo ku mugabane w’u Burayi.
Max Mathiasin, umwe mu badepite bakomoka muri Guadeloupe watanze uyu mushinga, yavuze ko iri tora rifite igisobanuro gikomeye ku rubyaro rw’abakomoka ku bacakara, agira ati: “Iki cyemezo ni uburyo bwo gusubiza icyubahiro abakurambere bacu no kongera guha agaciro ubumuntu bwacu.”
Icyakora, bamwe bavuga ko gukuraho iri tegeko bidahagije, ahubwo ko u Bufaransa bukwiye no kuganira ku ngaruka z’ubukoloni ndetse n’ibibazo by’ivangura bikigaragara muri zimwe mu ntara zabwo zo hanze y’u Burayi.
