Perezida wa Kenya, William Ruto, yatangaje ko gahunda yo gushyiraho ikigo cyo gushyiramo abantu bagiye kwitabwaho mu gihe cy’icyorezo cya Ebola itagamije guteza impungenge, nyuma y’uko urukiko ruhagaritse by’agateganyo uwo mushinga ndetse hakaba habaye imyigaragambyo y’abaturage bahangayikishijwe n’icyo cyemezo.
Ibi bibaye nyuma y’uko hateguwe ikigo cy’abanyamerika cyo kwa muganga ku kigo cya gisirikare cya Laikipia Air Base muri Kenya, cyari kigenewe kwakira Abanyamerika bava muri Repubulika Iharanira Demokarasi ya Congo, igihugu gikomeje guhangana n’icyorezo gikomeye cya Ebola.
Iki kigo cyari giteganyijwe gutangira gukora mu cyumweru gishize nk’uko byatangajwe n’abayobozi bo muri Leta Zunze Ubumwe za Amerika, kikaba cyarateganyirijwe ibitanda 50 byo kwitabwaho n’abarwayi, kikazajya gikorerwamo n’abaganga b’Abanyamerika.
Icyakora, uwo mushinga wakurikiwe n’imyigaragambyo yabereye hafi y’aho ikigo giherereye ku wa Mbere, aho abaturage bagaragaje impungenge bavuga ko kuba Ebola yajyanwa muri Kenya bishobora gushyira igihugu mu kaga. Polisi yakoresheje ibyuka biryana mu maso mu guhosha iyo myigaragambyo.
Amakuru yatangajwe n’inzego z’ubutabazi, zirimo Red Cross, agaragaza ko hari abantu babiri bakomeretse, nubwo hatigeze hemezwa amakuru y’abahasize ubuzima.
Kuri uyu wa Kabiri, Perezida William Ruto yanyujije ubutumwa ku rubuga rwa X, asobanura ko iki kigo kitari igitangaza cyangwa ikintu kidasanzwe ahubwo kiri mu rwego rwa gahunda rusange yo kwitegura ikiza, anongeraho ko kizakoreshwa mu nyungu za Kenya ndetse n’inshuti zayo harimo Abanyamerika.
Ku wa Mbere na bwo yari yagize ati: “Ibuka neza abaturage ba Kenya ko amasezerano hagati ya guverinoma ya Kenya na guverinoma ya Amerika ari mu nyungu z’igihugu cyacu no mu bufatanye.”
Yakomeje asaba abaturage kudahungabanywa n’ibivugwa, anenga abagerageza gukoresha politiki mu bibazo by’ubuzima rusange agira ati: “Kuki hari abantu bifuza guhindura iki kibazo gikomeye nk’icyorezo cya pandemiki bakagihindura ikintu cya politiki, bagakangurira abandi imyigaragambyo n’amagambo mabi?”
Yasoje avuga ko ubuyobozi bwe bufite inshingano kandi busobanukiwe ibyo bukora, bityo abantu bakwiye gutuza. Ati: “Turi guverinoma ifite inshingano. Tuzi ibyo dukora. Bityo abantu bakwiye gutuza.”
Kenya kugeza ubu ntiragerwaho na Ebola, nubwo hakomeje gukorwa igenzura ku bagenzi binjira mu gihugu. Icyakora, igihugu cya Uganda gituranye na Kenya cyamaze kugaragaramo abarwayi 11 barimo n’umwe wapfuye.
Mu cyumweru gishize, nibura abantu barenga 1,000 bakekwagaho Ebola bamaze kugaragara muri DRC kuva icyorezo cyatangazwa ku wa 15 Gicurasi, nk’uko bitangazwa n’ikigo Africa CDC.
Mu rwego rw’amategeko, Urukiko Rukuru rwa Kenya rwongeye kongerera igihe cyo guhagarika uwo mushinga, rutegeka ko Leta igomba gutanga ibisobanuro byose ku masezerano afitanye n’icyo kigo mu minsi irindwi.
Hagati aho, itsinda rito ry’abaturage ryagaragaye mu Mujyi wa Nairobi mu myigaragambyo, bambaye imyambaro yo kwirinda indwara z’ibyorezo, bafite n’isanduku yanditseho Ebola hamwe n’inyandiko zishinja uwo mushinga.
Ibi bibazo bikomeje kuzamura impaka mu gihugu hagati y’ubuyobozi, abaturage n’imiryango iharanira uburenganzira bwa muntu ku bijyanye n’umutekano w’ubuzima rusange.
William Samoe Ruto Perezida wa Kenya yasobanuye ibijyanye n’ikigo kigiye kujya cyakira abanyamerika bakekwaho Ebola
