Minisitiri w’Intebe w’u Rwanda, Dr. Nsengiyumva Justin, yakiriye Umuyobozi Mukuru w’Umuryango Mpuzamahanga ushinzwe Abimukira (IOM), Amy Pope, baganira ku bufatanye hagati y’u Rwanda n’uyu muryango ndetse n’uburyo bwakomeza guteza imbere imikoranire ihuriweho.
Ibiganiro byabaye kuri uyu wa Gatanu, tariki ya 21 Kanama 2026, ubwo Amy Pope n’intumwa ayoboye bari mu ruzinduko rw’akazi mu Rwanda. Nk’uko Ibiro bya Minisitiri w’Intebe byabitangaje, uru ruzinduko rugamije kongera imbaraga mu bufatanye hagati y’u Rwanda na IOM, cyane cyane muri gahunda zitandukanye zijyanye n’iterambere ndetse n’abimukira.
U Rwanda rumaze imyaka rufatanya n’imiryango mpuzamahanga mu gushakira ibisubizo abantu bahunze ibihugu byabo cyangwa basaba ubuhungiro. Kuva muri Nzeri 2019, u Rwanda rumaze kwakira abantu barenga 3,000 basaba ubuhungiro bakomoka muri Libya. Muri bo, 2,681 bamaze kubona ibihugu bibakira ndetse bamwe bahabwa ubwenegihugu.
Abenshi muri abo bantu bimuriwe mu bihugu byo ku Mugabane w’u Burayi no muri Amerika y’Amajyaruguru, nyuma yo kubona ibisubizo birambye bijyanye n’ubuzima bwabo n’imiterere y’ibyangombwa bafite. Gahunda yo kwakira aba basaba ubuhungiro yashyizweho mu rwego rwo kubaha ahantu hizewe mu gihe hakorwa isuzuma ry’ibyangombwa byabo ndetse n’izindi gahunda zijyanye no kubashakira ibihugu bibakira.
Mu mwaka wa 2019, u Rwanda rwagiranye amasezerano n’Ishami ry’Umuryango w’Abibumbye ryita ku Mpunzi, HCR, ndetse n’Umuryango wa Afurika Yunze Ubumwe (AU), yo kwakira by’agateganyo bamwe mu basaba ubuhungiro bari muri Libya.
Iyi gahunda yashyizweho mu gihe hakomeje gushakwa ibisubizo birambye ku bantu bari muri ibyo bibazo, birimo gusubira ku bushake mu bihugu bakomokamo cyangwa kwimurirwa mu bindi bihugu byemeye kubakira.
Uruzinduko rwa Amy Pope mu Rwanda rubaye mu rwego rwo gukomeza ibiganiro no gushimangira ubu bufatanye hagati ya IOM n’u Rwanda, cyane cyane mu bikorwa bijyanye n’imicungire y’abimukira no gushakira ibisubizo abari mu bibazo by’ubuhunzi n’ubwimukira.
