Mu Karere ka Kamonyi District, abaturage bifatanyije n’abayobozi mu gikorwa cyo kwibuka ku nshuro ya 32 Jenoside yakorewe Abatutsi mu 1994, cyabereye mu Murenge wa Mugina Sector. Iki gikorwa cyitabiriwe n’inzego zitandukanye z’ubuyobozi ndetse n’imiryango yabuze ababo muri Jenoside.
Minisitiri w’Ubutegetsi bw’Igihugu, Dominique Habimana, wari witabiriye iki gikorwa, yagarutse ku mateka ya Jenoside, agaragaza ko yaturutse ku buyobozi bubi bwari bwarashinze imizi mu ivangura, bugategura Jenoside kugeza igihe buyishyize mu bikorwa.
Mu ijambo rye, Minisitiri yagize ati:”Kwibuka n’umwanya wo gutekereza ku gaciro ko kugira ubuyobozi bwiza nk’uburiho mu Rwanda, maze abaturage bakabigiramo uruhare bakomeza kubana mu ubumwe n’amahoro.” Yanibukije abitabiriye ko ubuyobozi bwiza bugira uruhare rukomeye mu kubaka igihugu gitekanye kandi kirangwa n’ubumwe.
Yakomeje ashimangira ko nubwo abakoze Jenoside batsinzwe, hari abacyagerageza gukwirakwiza ingengabitekerezo yayo, asaba Abanyarwanda bose, abakuru n’abato, kuyirwanya badahwema kuko ari inshingano za buri wese.
Muri iki gikorwa kandi hashyinguwe mu cyubahiro imibiri 35 y’abazize Jenoside yakorewe Abatutsi, ishyingurwa mu Rwibutso rwa Mugina rusanzwe ruruhukiyemo abarenga ibihumbi 59 by’abishwe muri Jenoside yakorewe Abatutsi mu 1994. Iki gikorwa cyabaye umwanya wo kuzirikana amateka no gushimangira umuhigo wo kurinda ibyagezweho mu bumwe n’ubwiyunge.
Minisitiri Habimana Dominique yasabye abaturage gukomeza kubana mu bumwe n’amahoro
