Inyongeramusaruro nkeya zitabonekera igihe zidindiza iterambere ry’ abahinzi

Munyaneza Emmanuel/Pax Press

Abahinzi bibumbiye mu makoperative y’ abahinzi n’ aborozi bo mu mirenge ya Kibirizi, Muyira, Busoro na Busasamana bemeza ko itinda ry’ inyongeramusaruro no kuba zihenze ari bimwe mu bibazo biza ku isonga mu guhangayikisha abahinzi. Ibi ngo bituma badatera imbere kubera guhinga bakererewe imyaka yabo igakubitana n’izuba ryinshi.

Abahinzi batandukanye bo mu karere ka Nyanza batangaza ko nubwo kuri bo ubuhinzi buza ku isonga mu bukungu bwabo, bagihura n’ ibibazo by’ inyongeramusaruro zitaboneka kandi zinahenze. Bamwe mu bahinzi bahagarariye ayo makoperative bagaragaje ko hari ikigomba gukorwa kugira ngo bongere umusaruro uhagije mu buryo bwo kubagezaho ifumbire no kugabanya igiciro.

Ndayisaba Charles ni umuhinzi -mworozi uhagarariye itsinda ry’abahinzi ryitwa Icyerekezo mu murenge wa Busoro. Yavuze ko ibiciro by’ amafumbire bituma bacika intege kubera biba biri hejuru ugereranije n’ ubushobozi baba bafite.

Yagize ati” Ubu ifumbire ya NPK 17.17 dukoresha mu guhinga ibigori igura amafaranga magana atanu na makumyabiri ku kiro kimwe (520 FRS/kg) mu gihe UREE ikoreshwa mu kuhira twayiguze ku mafaranga Magana atatu na mirongo itanu n’atanu ku kilo(355frs/kg). Ubwo rero twebwe nk’ abahinzi tubona ayo mafaranga ari menshi.”

Munyampala Sylvestre ni Perezida w’ abahinzi-borozi bahinga mu gishanga cya Nganzo mu murenge wa Busasamana. Na we agaragaza ko bafite ikibazo cyo kutabona izi nyongeramusaruro ku gihe ndetse kandi ko zinahenda. Ati “Rwose inyongeramusaruro zirahenze kandi ziratinda ntituzibonera ku gihe.”

Yemeje ko kandi ibi byose bibagiraho ingaruka mu buhinzi bwabo ari nayo ntandaro yo kutabona umusaruro uhagije. Aba bahinzi barifuza ko Minisiteri ishinzwe ubuhinzi n’ ubworozi yareba uburyo ibakemurira iki kibazo mu gihembwe cy’ ihinga gitaha.

N’ifumbire y’imborera ni ikibazo

Aba bahinzi bibumbiye mu makoperative n’ amatsinda bagaragaje ko batabona n’ ifumbire y’ imborera. Ibi ngo biterwa ahanini no kubera ko badafite ubworozi buhagije. Batangaje ko baramutse babonye ifumbire y’ imborera ihagije bakayivanga n’ imvaruganda babona umusaruro ushimishije kurushaho. Bakomeje gushimangira ko ibi bibaye bakweza hagati ya toni esheshatu na zirindwi mu gihe ubu beza toni eshatu (3t).

Uwitwa Rugerimisare Nikodemu ni umuhinzi- mworozi uhagarariye abandi akaba anakora ubuvugizi bw’ abahinzi mu karere ka Nyanza. Yagize ati “Kubera amatungo adahagije, aba ari ibibazo kubona amafumbire y’ imborera ku buryo bworoshye”. Barasaba ko bakongererwa amatungo kugira ngo barusheho kubona amafumbire y’ imborera ahagije.

Ku rundi ruhande ariko Umuyobozi w’Akarere wungirije ushinzwe iterambere ry’ubukungu mu karere ka Nyanza, Mugabonake Théogène, avuga ko nubwo ibyo bibazo bikigaragara hari ikimaze gukorwa. Avuga ko kandi biteguye gufasha abahinzi mu buryo noneho bwo kubona inyongeramusaruro ku buryo bunogeye buri muhinzi wo mu karere.

Ati “Ubu hari intera tumaze gutera mu rwego rw’ ubuhinzi. Mbere twari munsi ya 10% tugendeye ku buryo abahinzi batakambaga bavuga ko nta mbuto ariko ubu byibuze tugeze kuri 50%. Ubu dushaka ko buri kagari kagira umucuruzi w’ inyongeramusaruro (agro dealer), tukabahugura, ndetse tukanabasobanurira byimbitse uburyo bwo gukoresha inyongeramusaruro”.

Uyu muyobozi atangaza ko imbuto n’ inyongeramusaruro zigiye kuboneka. Yijeje abahinzi ko batazongera guhura n’ibibazo byo gutinda kwazo. Yagize ati “Ubundi imbuto zatindaga kubera gutuburirwa mu mahanga mu gihe ubu leta y’u Rwanda ifite gahunda yo kuzituburira mu gihugu imbere mu buryo bwo kugira ngo zihenduke kandi ntizizongere gutinda kugera ku bahinzi.”

Ni kenshi usanga abahinzi binubira serivisi mbi mu rwego rw’ubuhinzi mu bijyanye no kubona inyongeramusaruro ku gihe hanyuma imyaka yabo ikazahazwa n’ihinduka ry’ ikirere. Akaba ari yo mpamvu basaba leta ko yazajya igerageza kwihutisha izi gahunda .

Mu karere ka Nyanza bahinze ibigori kuri hegitari ibihumbi bibiri na magana ane (2400 ha) bakaba biteze umusaruro ungana na toni eshatu kuri hegitari imwe (3t/ha), mu gihe ibishyimbo bahinze ubuso bungana na hegitari igihumbi na magana atatu (1300ha).

Be the first to comment

Leave a Reply

Your email address will not be published.


*